КӘРИМ ТИНЧУРИН ТЕАТРЫ МӘСКӘҮДӘ!

...Әлмәт, Чаллы, Азнакай, Буа, Мәскәү... Кәрим Тинчурин театры репертуарына күз салсаң әнә шундый озын исемлеккә юлыгасың. Театр артистлары һәрвакыт юлда, һәрвакыт хәрәкәттә. Бүген республикабызның бер почмагында булсалар, икенче көнне икенче башында. 23 ноябрьдә дә артистлар Мәскәү шәһәренең “Зуев” исемендәге Мәдәният йортында уйнап кайттылар. Мәскәү тамашачыларына Н.Гаетбаевның “Ничек кияүгә чыгарга?“ кызыклы комедиясе тәкъдим ителде.

Театр аристлары озын-озак юлдан соң башкалага барып төшкәч, аларны татар халкы өчен җан атып йөрүче «Заманча» продюсерлык үзәге хезмәткәре Харис әфәнде каршы алды. Милләттәшебезнең безгә карата булган хөрмәте, яратуы күңелгә зур куаныч китерде.

Кичке сәгать 7 дә башланасы спектакльгә тамашачылар бер сәгать алдан килгәннәр.

  Шаккатмалы: яшьләр дә, өлкәннәр дә күбесе татар милли киеменнән, татарча аралашалар. 535 урынлык залда нибары 50 кеше наушник белән спектакльнең тәрҗемәсен тыңлады. Тамашачылар ял итеп, канәгатьләнү хисләре кичереп, кызыклы мизгелләрдә рәхәтләнеп көлеп утырдылар.

Мәскәү татарлары бик үзенчәлекләре, үз милләтләре өчен янып-көеп торалар. Без моңа тагын бер инанып кайттык.  Шунысы куандырды – яшьләр күп килгән иде. Бу инде татар мәдәнияте яшь  буынны тәрбияләүдә зур роль уйный, мәдәният үсә дигән сүз. Дөрес, спектакльнең исеме дә җәлеп итәрлек бит: “Ничек кияүгә чыгарга?” Төп геройлары – апалы-сеңелле ике кыз. Апасын димләп киүгә бирмәкче булалар, ә сеңлесе үзеңә тиң ярны дискотекада очрата. Бәхетле булу теләге, кияүгә чыгу темасы һәрвакыт кызыксыну уята.

Спектакльдән соң безне дәррәү кул чабып, рәхмәтләр әйтеп озатып калдылар. Иншалла, яз көннәрендә тагын барырга исәп Мәскәү каласына.

Икенче көнгә исә кабат юл: Казан, Йошкар-Ола...