02.02.2017 Шоу-бизнес

Илфак Шиһапов Айсылу Габдинова концертларында җырларга җыена

“Яңа гасыр”да “Кайнар хит” тапшыруын алып баручы җырчы Айсылу Габдинова быелдан үз концертлары белән юлга кузгалды. Продюсеры Илфак Шиһапов аны “синең ирең юк, балаң юк, кайгыртырга мәчең дә юк, эшләргә кирәк...” дип гастрольләргә чыгарып җибәргән.

Айсылу Илфак Шиһаповның шактый гына җырларын башкара. Бүген алар яңа программа әзерләү белән мәшгуль. “Җырлар бик күп, сайлыйбыз, әзерләнәбез инде. Көн саен диярек очрашабыз, - ди Айсылу. - Вакыт җитми инде. Әле бит Венера Ганиева кафедрасында укыйм, телевидениедә тапшырулар алып барам, музыка мәктәбендә укытам да мин”.

“Алар бергә яши икән” дигән имеш-мимешләргә Айсылу белән Илфак көлеп кенә карыйлар.

Айсылу Габдинованың “Көткән бәхетемә таба..” дигән программасы шактый кызыклы булырга охшаган. “Әтием Татарстанның атказанган артисты Айдар Габдинов та катнаша. Иң зур яңалык шул - программада Илфак Шиһапов үзе дә булачак. Сорауларга җавап бирәчәк , “акыллы” фикерләре белән бүлешәчәк һәм...җырлыячак та. Илфак абый куркыбрак тора инде үзе сәхнәгә чыгудан, тик менә белсен әле үзе өйрәткән балаларга ничек “җиңел” икәнен”, - дип көлеп сөйләде Айсылу “Матбугат.ру” хәбәрчесенә.

Февраль аена гастрольләр графигы әлегә менә болай:

09 февраль – Шаран районы Түбән Зәет авылы (Башкортстан)

10 февраль – Шаран районы Ташлы авылы (Башкортстан)

11 февраль – Шаран районы Базгыя авылы (Башкортстан)

12 февраль – Шаран районы Чалмалы авылы (Башкортстан)

18 февраль – Балтач мәдәният йорты

24 февраль – Кукмара районы Пчеловод авылы

25 февраль – “Бәкер” шифаханәсе

27 февраль – Кукмара мәдәният йорты

---
Матбугат.ру
№ --- | 02.02.2017