Транспорт прокуратурасы: “Бигеш” аэропортына куркыныч яный

Кама транспорт прокуратурасы “Зәй” агрофирмасына федераль законны бозудагы кимчелекләрне төзәтү буенча күрсәтмә юллады. Эш шунда ки, терлекчелек комплексы “Бигеш” аэропортына якын урнашкан, ә бу исә очышларның куркынычсызлыгына яный. Бу хакта «Татар-информ» мәгълүмат агентлыгына Кама транспорт прокуроры ярдәмчесе Ринат Саттаров хәбәр итте.

Күзәтчелек ведомствосына аэропорт вәкилләре мөрәҗәгать иткән. Алар Зәй районында Әхмәт авылындагы терлекчелек комплексының кошларны көтүләре белән җәлеп итүен җиткергәннәр. Бу исә очышларның иминлегенә зур куркыныч тудыра. Билгеле булганча, бер кош двигательгә эләгә калганда да, көтүен әйткән дә юк, авиаһәлакәт сәбәбе булырга мөмкин.

Прокурорлар терлекчелек комплексының аэропорттан 12 чакрым ераклыкта булуын ачыклаган. Алар тикшергәндә дә йөзләп кош шунда туклана торган булган, бу фактны алар билгеләгән.

Федераль закон нигезендә терлекчелек фермалары, терлек сую урыннары, азык объектлары, калдыклар өчен чокырлар, силос базлары һәм шуңа охшашлы башка авыл хуҗалыгы объектлары очыш юлларына 30 километрдан да якында яки очыш юлларыннан соң 15 километрдан еракта урнашкан булырга тиеш.

Федераль закон үз көченә 2010 елда ук кергән. Аны кабул итү кошларның самолет турбиналарына эләгеп, күпсанлы кешеләр үлеме белән авиаһәлакәтләр саны ешайганга кабул ителгән.

Ринат Саттаров мәгълүматы буенча, Зәй районында Әхмәт авылындагы “Зәй” агрофирмасы бинасы таләпләр башка төрле булган чорда, узган гасырның икенче яртысында төзелгән. Ә хәзерге терлекчелек комплексы 2013 – 2014 елларда эшли башлаган. Шунлыктан Кама транспорт прокуратурасы “Зәй” агрофирмасына кимчелекләрне төзәтү буенча күрсәтмә юллаган.

«Без “Зәй” агрофирмасы ябылуын таләп итмибез, корылмаларны гына алсыннар. Әмма ферма буларак эшли алмый ул – биредә кошларны җәлеп итүче азык объектлары ябылырга тиеш», – дип аңлатты күзәтчелек ведомствосы карашын Ринат Саттаров, прокуратураның судка мөрәҗәгать итәргә мәҗбүр булуын җиткереп.

«Татар-информ» мәгълүмат агентлыгы сораулар белән “Зәй” агрофирмасы директоры Владимир Егоровка мөрәҗәгать итте, әмма ул хәзерге вакытта ни дә булса аңлатудан тыелды.