|
|
Бүген кемнәр туган
|
|
Архив
|
13.01.2017 Мәдәният
Хуш, бәхил бул, Өлкән апа!Финляндиядән кайгылы хәбәр килде: хөрмәтле милләттәшебез Өлкән ханым Али вафат. Аңа күптән түгел 80 яшь тулды. Ул Финляндия татарларының Исламия җәмгыяте рәисе Атик Алиның әнисе. Бу хәбәргә ышанырлык та түгел: әле яңа гына, 28 ноябрьдә, Өлкән апа Казанга, Рәшит Ваһапов фестиваленең гала-концертына килде. Бөтен залга нурын таратып, кояш кебек балкып утырды. Сәхнәгә менеп, Финляндия татарлары исеменнән мине туган көнем белән котлады. Казандагы яңалыклар белән нык кызыксынды, киләчәккә матур уй-хыяллары бар иде аның… Өлкән ханым милләтпәрвәр шәхес иде. Ул мәшһүр Абдулла Алиның хатыны иде. Бу гаилә Финляндиядә татар рухын саклап, аны үстерүгә, милләттәшләребезнең Казан, татар дөньясы белән элемтәләрен ныгытуга зур өлеш кертте һәм кертә. Озак еллар Финляндиянең Исламия татар җәмгыятен Абулла Али җитәкләде, бүген исә бу эшне аларның улы Атик Али алып бара. Өлкән апа улының бу эшенә борчылып һәм горурланып яшәде. Өлкән апа озак еллар безнең фестиваль белән тыгыз элемтәдә булды, безнең якын дустыбыз, фикердәшебез, киңәшчебез һәм ярдәмчебез иде. Рәхмәт аңа! Өлкән апа, аның гаиләсе бик күп татар зыялылары (Илһам Шакиров, Рөстәм Яхин, Марсель Сәлимҗанов, Хәйдәр Бигичев, Зөһрә Сәхабиева һ.б.) белән дустанә мөнәсәбәттә булып, аларга кадер-хөрмәтен кызганмады. Өлкән апа Финляндия татарларының тере энциклопедиясе иде. Ул бик күп тарихи материал туплады, аны яшьләргә тапшырып калдырырга тырышты. Бу олы югалту уңаеннан, Финляндия татарларының Исламия җәмгыяте рәисе Атик әфәнде Алиның, аның туганнары Сюзан ханым хәм Акиф әфәнденең, гаиләләренең, якыннарының, якташларыбыз, милләттәшләребезнең тирән кайгысын уртаклашам, Ходайдан сезгә сабырлык сорыйм. Хуш, бәхил бул, Өлкән апа! Урының оҗмахта булсын!
--- |
Иң күп укылган
|