Казан аэропортында кичектерелгән авиарейс пассажирлары өчен Роспотребнадзор "кайнар линия" ачты

Урамда юлларда бозлавык урнашу сәбәпле, бүген “Казан” Халыкара аэропортында авиарейслар тоткарланды. Бу уңайдан Кулланучылар хокукын яклау һәм кеше иминлеге өлкәсендә күзәтчелек буенча федераль хезмәтнең Татарстан идарәсе (Роспотребнадзор) авиапассажирлар өчен “кайнар линия” ачты, дип хәбәр итә идарәнең матбугат хезмәте.

Пассажирларлар кичектерелгән рейслар турында бүген, 11 ноябрьдә, 10.00-15.00 сәгатьләрдә 8(917)224-87-94 телефонына шалтыратып белешә ала.

Юлга чыга алмаган пассажирларга Татарстан Гигиена һәм эпидемиология үзәгенең консультация үзәгенә мөрәҗәгать итәргә тәкъдим ителә (тел.: 8(843)221-90-16). РФ Гражданлык кодексының 795 нче маддәсе 2 нче пункты буенча, әгәр транспорт чарасының китү вакыты кичектерелү аркасында пассажир билеттан баш тартса аңа акчасы кире кайтарылырга тиеш.

РФ Гадәттән тыш хәлләр министрлыгының Татарстан буенча идарәсе мәгълүматлары буенча, бүген "Казан" аэропорты һава аланын 11.35 сәгатьтә ачкан. Мәгълүм булганча, аны бозлавык сәбәпле, иртәнге 4.35 сәгатьтә япканнар иде, шул вакыттан 13 рейс тоткарланган.