|
|
Бүген кемнәр туган
|
|
Архив
|
21.10.2016 Хәйрия
Өйдә көтәр улы барКазан шәһәренең Отар бистәсендә гомер итүче 25 яшьлек Артем Николаев мәкерле авыру диагнозы белән дүрт ел яши. “Баштарак улыбызда начар авыру дип башыбызга да килмәде. Ә белгәч, бөтенләй югалып калдык”, – ди әтисе Павел. Бүген алар якын кешеләрен коткару турында хыяллана. Артем – белгечлеге буенча пешекче. Әмма Универсиада вакытында башка эшкә күчә. Һөнәрен үзгәртеп, тирә-якны яшелләндереп, чәчәкләргә су сибеп торган. “Эш тә күп булды, ял итмичә эшләде. Ә бер көнне тән температурасы күтәрелеп, авырый башлады. Берәр атнадан соң, хәле җиңеләеп китте-китүен, әмма тагын температурасы күтәрелде. Улыбызны йогышлы авырулар хастаханәсенә алып киттеләр. Кан анализлары бик начар булган. Табиблар эшнең нидә икәнен сизеп, Артемны 16 нчы хастаханәнең гематология бүлегенә күчерделәр”, – дип сөйли Павел.
Әмма анда күчергәч тә, әти-әнисе дә, хатыны да Артемда лейкоз авыруы икәнен белмиләр. Тик ана йөрәге генә сизенә. Икенче көнне әнисе табиблар янына барып, дөресен әйтергә куша. Якыннары борчылсалар да, Артемның күңелен төшермәскә тырышалар. “Синдә кан авыруы тапканнар, дәвалангач уза ул, дидек. Әмма интернет заманында чирне яшереп буламы соң? Улым үзе дә барысын да аңлаган, – ди әтисе. – Баштарак, ышанып бетмичә, анализны тәгаенләр өчен Мәскәүгә дә бардык, Санкт-Петербург табибларына да күрендек. Алар да Казан белгечләре куйган диагнозны раслады. Улымда лейкоз таптылар. Хәзер Артем авыруы көчәйгән саен хастаханәгә керә. Озак вакыт дәваланып чыга.
Әлегә ул химия терапиясе ала. Начар күзәнәкләр арту белән аларны юкка чыгаралар. Соңгы анализлары начар түгел. Хәзер улыбыз өчен донор эзлибез. Табиблар әйтүенчә, арка миен күчереп утыртырга кирәк. Шунсыз яхшыга өметләнеп булмый. Үзебезнең гаиләдән донор таба алмадык. Инде читтән эзлибез”.
Артем авыруы турында уйламаска тырыша икән. Шулай җиңелрәк, ди. Тик куркыныч авыру турында уйламау мөмкинме соң?! Әмма үзенең генә түгел, якыннарының да күңеленә өмет салырга кирәк. “Аны бит өйдә әти-әнисе, әбиләре, хатыны, улы көтә. Әнә шуңа да ул үзендә яшәргә көч таба. 3 яшьлек улы телефоннан: “Әти, сагындым, кайт, көтәм!” – ди. Үлем турында уйламыйбыз да. Гаиләбездә сагышланып, елап та утырмыйбыз. Алдан шулай сөйләшеп куйдык, – ди Павел. – Без бергәләп бу чирне җиңәргә тиеш. Тик матди яктан гына хәлебез бераз мөшкелләнде. Дүрт ел җыйган акчабызга дәваландык. Инде хәзер мөмкинлегебез калмады. Донорны бер хәйрия фонды чит илдән эзли.
Табылган очракта, операцияне Россия табиблары ясаячак. Донор өчен 18 мең евро акча кирәк. Шуңа да газета укучылардан ярдәм сорарга булдык”, – ди Павел.
Ярдәм итәргә теләүчеләр өчен Артемның әнисе Любовь Николаеваның Сбербанк картасы номеры:
4276862019071556
Гөлгенә ШИҺАПОВА |
Иң күп укылган
|