Резедә Сәләхова белән Артём Пискунов яшь җырчыларның хыялларын тормышка ашырырга булыша

GONGTV спорт һәм музыка каналында яңа сезоннан чыга башлаган “Йолдызлы алачык” тапшыруының алып баручылары Резедә Сәләхова һәм Артём Пискунов үзләрен тәүге тапкыр телевизион алып баручылар сыйфатында сынап карады. Берничә чыгарылыш эшләп, камера каршында җаен алган Артём белән Резедә үзләренең тәэсирләре белән уртаклашты.

–  Безнең өчен бу яңа өлкә. Артёмның да, минем дә күптән телевидениеда берәр тапшыру алып бару теләге бар иде. Ихлас теләгән теләк чынга аша диләр бит, әлеге өлкәдә үзебезне сынап карау кызык. Эфирга чыккан тапшыруларны карап, үзебезнең ялгышларны күреп, төзәтергә, камилләшергә тырышабыз. Шунысы уңайлы – безне җитәкчелек бернинди кысалар белән дә чикләми. Тапшыруның ирекле форматы иҗат итәргә, эзләнергә мөмкинлек бирә. Кунакларга килгәндә, аларның күбесе бик яшь, эстрадага  яңа аяк басып киләләр, шуңа күрә сәхнә турында фикерләре дә үзгә. Алар чын күңелдән татар җыр сәнгатенә яңалык кертергә телиләр. Без  исә яшь башкаручыларга әлеге омтылышларында киртәләргә очрамыйча, уңышларга ирешүләрен телибез. Әлбәттә, барысы да йолдыз булып бетә алмас, тик кешенең хыялын чәлперәмә китерергә беркемнең дә хакы юк. Эшләп карасыннар, вакыт һәм халык ихтыяҗы барысын да үзе күрсәтер, – дип белдерде Резедә.

Артём Пискунов һәм Резедә Сәләхова – Кәрим Тинчурин исемендәге татар дәүләт драма һәм комедия театры артистлары, мәртәбәле чараларның алып баручылары.