Мәскәүдә көчле янгын: 8 янгын сүндерүче үлгән

Мәскәүнең көнчыгышында урнашкан пластик эшләнмәләр складында көчле янгын чыккан. Гадәттән тыш хәл белән көрәш алып баручы 8 янгын сүндерүченең үле гәүдәсе табылган. "Алардан хәбәр булмаса да, азакка кадәр яхшыга өметләндек, – дип җиткергән РФ Гадәттән тыш хәлләр министрлыгы матбугат хезмәте. – Көчле янгын, югары температура, төтен аркасында алар бинадан чыга алмаган".

Үлүче хезмәткәрләр түбәдә эшләгән – янгын аркасында шартлау куркыныч булган газ балоннары һәм компрессорларны суыту өчен махсус җайланма урнаштырганнар. Ә аңа кадәр алар, янгын булган урынга беренчеләрдән булып килеп, складтан 100ләп эшчене чыгарырга өлгергән.

Янгын кичә кич чыга. Ләкин аны иртән генә сүндерә алалар. Янгын чыгуның төрле фаразлары тикшерелә.