Мансур Мортазинга бүген 50 яшь!

Журналист Мансур Мортазинга бүген 22 сентябрь көнне 50 яшь тулды. Мансур әфәндене матбугат укучылары төрле басмалар аша хәтерлидер. Бүген медиамәйданнан бераз югалып торган кебек тоелса да, ул актив иҗатын һәм эшчәнлеген дәвам итә.

Төп-төгәл чирек гасыр элек нәкъ шушы көнне "Татарстан яшьләре" редакциясендә Мансур Мортазинның 25 яшьлек юбилеен бәйрәм итәләр. Шунда баш мөхәррир Исмәгыйль Шәрәфиев болай дип куя: "Мансур, сиңа ничек 25 кенә соң? Укып бетергәнсең, Германиядә хезмәт иткәнсең, өч ел себердә эшләгәнсең, инде бездә ничә ел... 25 килеп чыкмый бит!" 

Чыннан да, армия хезмәте, себердә эшләү, Чаллыда "Аргамак" журналын чыгару, Рәфгать Алтынбаев мэр булып эшләгән чакта аның командасында хезмәт итү, аннары инде Казан, радио, "Татарстан яшьләре", "Ватаным Татарстан", "Шәһри Казан"да баш мөхәррир булу һ.б. һ.б. Төрле шәһәрләрдә, төрле матбугат чараларында, төрле вазыйфаларда туплаган тәҗрибәсе бик зур булып чыга Мансур әфәнденең.

Бүген ул Татарстан китап нәшрияты белән тыгыз хезмәттәшлектә. Редактор буларак аның аша күп китап уза. 

"Матбугат.ру" исеменнән Мансур абыйны чын күңелдән котлыйбыз! Үзенә һәм үрнәк гаиләсенә иминлек һәм бәхет телибез! 

Сүз уңаеннан, быел җәй Мортазиннар олы кызлары Алияне кияүгә биргәннәр. Монысы да үзенә күрә тормыш тәҗрибәсе, тормыш багажы. Бәхетле булсыннар!

_{Фото: art16.ru}