|
|
Бүген кемнәр туган
|
|
Архив
|
10.09.2016 Дин
Илдус Фәизов диндәгеләр дин һәм Коръәннең асылын онытты, дип саный"Диндә экстремизм — ул аны сәясиләштерү. Диндәгеләр — дин турында һәм Коръәннең асылын онытты". Татарстанның элеккеге мөфтие, “Болгар” мәчете имам-хатыйбы Илдус Хәзрәт Фәизов бүген “Стоп:экстремизм!” дип исемләнгән “түгәрәк өстәл”дәге чыгышында шулай дип белдерде. “Ислам экстремизмы хакында сөйләгәндә, будда экстремизмы, Үзәк Африка дәүләтләрендә христиан экстремизмы хакында да онытырга ярамый. Дингә “изм” кушымчасы ялгана икән, диннәр түгел, ә экстремизм барлыкка килә. Динне сәясәтләштерергә ярамый”, - ди имам-хатыйб.
Илдус хәзрәт Фәизов фикеренчә, теләсә кайсы конфессиядә сәяси чалымнар бар икән, бу экстремизмга һәм террорга китерә. “Элек социализм һәм капитализм бар иде. Табигатьтә ике яклылык юк, ул кешедә генә бар. Табигатьтә яхшылык һәм начарлык дигән әйберләр очратып булмый, ул кешеләрдә бар”, - дигән фикердә хәзрәт.
Экстремизмны бетерү өчен ул кайбер тәкъдимнәрен дә кертте. Беренчедән, мәчетләргә сәясәтне кертүне туктатырга. Бу башка диннәрнең гыйбадәт йортларына да кагыла. Икенчедән, наданлык һәм дини белемсезлек белән көрәшергә. “Бер авылга агитатор килгән дә, наданлык, белемсезлек белән көрәшергә кирәк, аны бетерергә, дип әйтә ди. Шул вакыт урамда ату тавышы ишетелә. Мәчеттәге берәү: Шакирҗановны бетерделәр, надан иде, дип куйган. Юк, андый юл белән белемсезлекне бетерергә кирәк түгел. Аңлату зарур. Мәчетләрдә, чиркәүләрдә генә түгел, экстремизм бөтен җирдә дә бар”, - диде Илдус хәзрәт Фәизов чыгышында.
Имам-хатыйб торерантлык, бер-береңне аңлау һәм төрле диннәргә хөрмәт белән карау мәсьәләсен дә күтәрде. Без моның белән инде әллә ничә йөз ел элек “авырган” идек, хәзер без башка диннәргә тыныч карыйбыз, диде ул һәм иң толерант илләргә мисал буларак Сүрия дәүләтен китерде.”Анда мөселманнар да, христианнар да, яһүдләр дә яшәде. Беркем дә беркемгә тимәде, кагылмады. Белемне алар беренче чыганаклардан алды. Вакыты җитте дә, бу дөнья бер мизгелдә юкка чыкты. Ник бу хәл килеп чыкты? Нишләп шундый дус яшәгән халыклар кулларына корал алып, бер-берсен үтерә башлады? Бу һаман да әлеге дини институтларның сәясиләшүенә кайтып кала”, - дигән фикердә Илдус Фәизов.
Татарстанда мондый хәлләрнең килеп чыкмавын ул җитәкчеләрнең вакытында дөрес карарлар кабул итүеннән күрүен дә белдерде.
Илдус Фәизов Тәтеш районы Олы Тархан авылында туган. Армия хезмәтеннән соң Казан театр училищесын тәмамлый һәм К.Тинчурин исемендәге драма театрында эшли. 1998-2001 елларда исламны кабул итүнең 1000 еллыгы исемендәге мәдрәсәдә, соңрак Иорданиядә, Катарда курсларда укый. 2002 "Болгар" мәчете имам-хатыйбы, 2011 елда Татарстан мөселманнарының Диния нәзарәте рәисе, мөфти итеп сайлана. 2012 елда Диния нәзарәтенең уку бүлеге җитәкчесе Вәлиулла Якупов атып үтерелә, мөфти Илдус Фәйзов утырган автомобиль шартлатыла. Илдус Фәизовның, аягына зыян килә һәм аңа операция ясыйлар.
2012 елда аны Президент Путин Дуслык ордены белән бүләкли.
2013 елда, сәламәтлеге начар булу сәбәпле, үз теләге белән эшеннән китә.
Лилия ЛОКМАНОВА |
Иң күп укылган
|