|
|
Бүген кемнәр туган
|
|
Архив
|
07.09.2016 Мәгариф
Казанда булып кайттык21-23 август көннәрендә Казан шәһәрендә Россия Федерациясе төбәкләре мәгариф оешмалары җитәкчеләренең, татар теле һәм әдәбияты укытучыларының семинар-киңәшмәсе булып үтте. Киңәшмәне Татарстан Республикасы Мәгариф һәм Фән министрлыгы оештырды. Семинар-киңәшмә эшендә Татарстан Республикасы Президенты Аппараты, Республиканың Дәүләт Советы, Министрлар кабинеты, Бөтендөнья татар Конгрессы башкарма комитеты вәкилләре катнашты. Киңәшмәгә Россия Федерациясенең 28 төбәгеннән 150 делегат һәм Татарстан Республикасыннан 100 делегат килгән иде. Чарада безнең өлкәдән дә алты кешелек делегация катнашты. Аның составында өлкә татар автономиясе җитәкчесенең урынбасары Рәзилә Ахмадуллина, Сафаҗай, Уразавыл, Татар Моклокасы һәм Камка мәктәпләренең татар теле укытучылары Сара Сираҗетдинова, Мәрзия Харрасова, Галия Кутерова, Рәмзия Сулиманова һәм Гөлнур Мангушева (фотода) бар иде. Киңәшмә бик эчтәлекле узды. Аның кысаларында конструктив дискуссияләр, педагогик уңышлар күргәзмәсе, мастер-класслар оештырылган иде, татар милли мәгарифе өлкәсендә булган проблемалар, мөһим бурычлар билгеләнде. Киңәшмәнең беренче көнендә “Биләр Палас” отеленә урнашканнан соң, Галиәскәр Камал театрында “Исәнме, улым” спектаклен карадык. Өлкән буын артистларыбыз арасыннан Наилә Гәрәеваның уйнавын күзәтеп хозурландык.
Семинарның икенче көне бик эчтәлекле, тыгыз булды. Төшке ашка кадәр безне дүрт төркемгә бүлеп, алдынгы лицей һәм гимназияләрнең эшчәнлеге белән таныштырдылар. Төштән соң Югары Ослан районында төзелгән Иннополис шәһәренең мәгариф оешмаларында булдык, аннары Арча муниципаль районы Яңа Кырлай авылында урнашкан Кырлай музей-тыюлыгына экскурсиягә бардык.
Киңәшмәнең соңгы көнендә Татарстан Республикасының Халыклар дуслыгы йортында пленар утырышта катнаштык. Анда республиканың премьер-министр урынбасары, мәгариф һәм фән министры Энгель Фаттахов, Бөтендөнья татар конгрессы рәисе Ринат Закиров, Дәүләт Думасы депутаты, федераль милли-мәдәни автономия советы рәисе Илдар Гильмутдинов та катнаштылар. Шулай ук татар теле һәм әдәбияты буенча укыту- методика комплекты күргәзмәсе белән таныштык, күпләп методик әдәбият сатып алдык. Безнең өчен бу чара бик кызыклы һәм әһәмиятле булды – очраштык, таныштык, фикер алыштык. Мәскәүнең 1186 нчы номерлы этно-мәдәни компонентлы мәктәбендә белем бирүче якташларыбыз Илсөяр Зарипова һәм Ләлә Саитова белән очрашу да күңелләребездә тирән эз калдырды.
Мондый эчтәлекле, файдалы чара уздырганнары өчен Татарстан Республикасы хөкүмәтенә, Мәгариф һәм Фән министрлыгына олы рәхмәтләребезне белдерәбез һәм эшләрендә зур уңышлар телибез.
Гөлнур МАНГУШЕВА,
Камка мәктәбенең татар теле укытучысы.
Гөлнур МАНГУШЕВА |
Иң күп укылган
|