Закир Шаһбан: "Тамашачыма әйтәсе сүзем бар!"

2016 ел - Татарстанның атказанган артисты Закир Шаһбан өчен истәлекле вакыйгалар елы. Беренчедән, 6 сентябрьдә Закир Шаһбанга - 50 яшь, икенчедән, аның иҗатына 25 ел тула. Бу уңайдан 6 сентябрь көнне Казанның Филармония концертлар залында Закир Шаһбанның иҗат кичәсе узачак.

- Концертта үзем генә түгел, иҗатташ дусларым да чыгыш ясаячак. Алар арасында Рәсим Низамов, Резеда Шәрәфиева, Айгөл Бариева, "ЗөЛәйЛә", Артур һәм Марат, ТР Дәүләт Фольклор ансамбле, "Казан" бию ансамбленең Илдар Хәмидуллин җитәкчелегендәге төркеме чыгыш ясаячак. Татарстанның халык артисты, остазым Миңгол Галиев, Екатеринбургтан Татарстанның атказанган артисты Хәйдәр Гыйльфанов киләчәк. Новосибирск өлкәсенең милли-мәдәни үзәге җитәкчесе, Татарстанның атказанган мәдәният хезмәткәре Рауза Тихомированың килүе көтелә. "Россия тимер юллары" ААҖ беренче вице-президенты Хәсән Шәрифҗан улы Зябировның килүе аеруча сөендерә. Дәрәҗәле кеше булуына карамастан, ул сәнгатьне бәяли торган, минем иҗатыма мөкиббән булган кеше, - дип белдерде Закир Шаһбан.

Кичәнең икенче бүлегендә исә Закирның тормыш иптәше Гөлүсәнең "Кабатланмас безнең сөюләр" дип исемләнгән шигырьләр җыентыгы тәкъдим ителәчәк. Әлеге иҗат җимешләре арасында Закир Шаһбанга багышлап язылганнары да бар. "Концертта төрле бәйгеләрдә җиңү яулаган 7 яшьлек Рузанна Газизҗанова исемле кыз һәм 19 яшьлек күрмәүче кыз катнашачак. Безнең кебекләрне җәмгыять тиешенчә бәяләми, башка төрле караш сизелә. Мин беркайчан да кызгану хисенә мохтаҗ булмадым, миңа сау-сәламәт кешегә караган шикелле карауларын телим. Кеше күңеленә керү өчен хезмәтеңне берникадәр арттырып башкарырга кирәк. Әлеге күрмәүче кыз Курск шәһәрендә укый. Узган ел ул лаеклы рәвештә "Татар моңы" җыр бәйгесендә I премиягә ия булды", - диде Закир Шаһбан.

6 сентябрь көнне Закир Шаһбан үзенең иҗатына, җырлавына, баянда уйнавына битараф булмаучыларны иҗат кичәсенә чакыра. "Бәлки аннан соң эстрадада бөтенләй күренмәм? Иртәгә ни буласын Аллаһы Тәгалә генә белә. Ләкин бүген минем тамашачыма әйтәсе сүзем бар!" - дип белдерде җырчы.

Юбилей концертын җырчы туган ягы Новосибирск өлкәсендә дә тәкъдим итәргә җыена. 1 октябрьдә Омск, 2 октябрьдә Новосибирск шәһәрләрендә Закир Шаһбанның концертлары узачак.

Закир Шаһбан 1966 елның 6 сентябрендә Новосибирск өлкәсе Чаны районы Тармакүл авылында дөньяга килә. 1991 елдан ул Новосибирск Татар милли-мәдәни үзәгендә эшли. Закир Шаһбанның музыкага сәләтен Илһам Шакиров Себергә гастрольгә баргач күреп ала һәм Казанга чакыра. Шулай итеп, 1993 елда Закир Казанга күченә. 1994 елда Закир Шаһбанны Татарстанның халык артисты Миңгол Галиев белән таныштыралар. Һәм булачак җырчы Казан дәүләт педагогика институтына Миңгол абый классына укырга керә. Ә инде 1995 елда Закир Шаһбан "Татар җыры" бәйгесендә II премиягә ия була.