Мөнир Рахмаевны биетүче Динара Ряхимова белән интервью (ФОТО, ВИДЕО)

Латин Америкасы ритмнарын татар җырларына буйсындыручы Динара Ряхимова аерым бер зәвык белән эстрадага кереп китте. Һәрбер җырында лирик нечкәлек чагылыш тапкан яшь җырчының тамырлары Түбән Новгород өлкәсенә килеп тоташа. Үзе Мәскәүдә яши, иҗат итә. Динара җырга моңлы һәм баянда оста уйнаучы әтисе ягыннан тартылган, ул хәтта үз ансамблен дә булдырган.

Бер көн дә музыкадан башка үтмәгән бу гаиләдә Динараны җыр нигезләренә апасы өйрәткән, призлы урыннар яулаган конкурсларга әзерләгән. Әкренләп гаилә ансамблендә чыгыш ясый башлаган Динара Ряхимова инде үз карьерасы өстендә эшли.

- Динара, күптән түгел “Яшь гомер бер генә” җырына клибың чыкты. Клип җырны тулыландырып, баетып тора. Үзеңдә нинди тәэсирләр? Видео син теләгәнчә килеп чыктымы?
- “Яшь гомер бер генә” җыры минем өчен башыннан ук үзенчәлекле булды.

 Әлеге җыр белән тормышның һәр мизгеле дә кадерле икәнне искәртәсем, клип белән тамашачыларны илһамландырасым килде. Җырны тыңлаган һәркем теләгәнгә ирешә алуны аңларга тиеш. Барлык теләкләремне клип тулы мәгънәдә ачып бирә, мин нәтиҗә белән бик канәгать калдым, идеялар тормышка ашты. Дөресен әйткәндә, көткәннән яхшырак та килеп чыкты.

- Клипта төп рольдә  Мөнир Рахмаев үз бию осталыкларын күрсәтә. Аның катнашуы ничек килеп чыкты?
- Алдан ук әйтеп куясым килә, җыр татарча булуга карамастан үзендә берничә стильне берләштерә. Татар җыры Латин Америкасы ритмнары белән кушыла. Бу үзенчәлекне биюдә күрсәтергә шактый авыр. Төп геройны сайлау юкка гына Мөниргә төшмәде, аннан да яхшырак  бу вазыйфаны башкаручы булмас иде. Ул ярдәм итәргә ризалашты, моның өчен бик рәхмәтле Мөниргә. Хореографияне дә бик җиңел үзләштерде, биюне куйганда да киңәшләрен биреп торды. Мөнир Рахмаев кабатланмас образ тудыра алды һәм үз ролен профессиональ башкарып чыкты.

- Инде икенче клибыңның эчтәлеге Латин Америкасы биюләре белән бәйләнгән? Бу төр биюләргә мәхәббәтме синең? Үзең бию белән шөгыльләнәсеңме?
- Мин Латин Америкасы мәдәниятен бик яратам, бу илләрдә күп сәяхәт итәм. Татар эстрадасына да үзенчәлекле яңалык кертәсем килде. Кубада булганда  мин шунда яшәүче татарлар белән таныштым, алар туганнан бирле Кубаның башкаласы Гаванада яшиләр. Таныш булмаганнар белән туган телдә аралашу мөмкинлеге бик сирәк килеп чыга аларга, шулай да безнең сөйләшүдә алар татар җырларын латин ритмнары белән ишетергә теләүләрен әйттеләр. Шул мизгелдән минем бу идеяны тормышка ашыру теләге туды да. Биюләрне мин бик яратып башкарам һәм инде күптәннән шөгыльләнәм.

- Яздырылган җырларыңның авторы әлегә бер. Кайсы авторлар белән эшләргә яратасың? Бер авторга гына бәйлелек бармы?
- Авторлардан миңа Эльвира Сафина шигырьләре ошый . Ул бөтен уйларын шуның кадәрле ачык, чын күңелдән, тәэсирләнеп җиткерә ки, сокланмыйча мөмкин түгел. Көйләргә килгәндә, Владимир Федоров, Марат Мухин, Оскар Усманов, минемчә, яхшыларның яхшысы, аларның җырлары инде күп еллар барлык тыңлаучыларны сөендерә һәм лаеклы рәвештә популярлар рәтендә.

- Яңа җырың әти-әниләргә багышлана. Бу кадерле кешеләреңә карата рәхмәт белдерелгән бүләк-җырмы?
- Яңа җырым минем чыннан да әти-әниемә багышланган. Әтиемнең күптән түгел генә туган көне булып узган иде, бүләк буларак әлеге җырны башкардым. Минемчә, иҗади кешегә яхшырак бүләк булырга мөмкин дә түгел, җыр бит мәңгелек.

- Әлеге җырны Марат Мухин белән бергәләп яздырдыгыз. Аның белән эшләү ничек барды?
- Марат Мухин белән бик җиңел эшләргә. Җырны яздырыр алдыннан бик дулкынланам, ләкин нәкъ менә Марат белән бик уңайлы булды эшләргә, бүгенге көндә андый осталар сирәк очрый. Ул чыннан да музыка өлкәсендә профессионал.  Бергәләп шаярып, көлешеп, яхшы кәефтә җырны уңышлы яздырдык, ахырдан хәтта китәсе дә килмәде.

- Син нык адымнар белән популярлаша барасың, концертларда, федераль Сабантуй сәхнәләрендә чыгыш ясыйсың. Продюссерлар әле тәкъдим ясамыймы?
- Тәкъдимнәр килә башлады, ләкин барысы да әле нияттә. Планнар күп, аларны тормышка ашырырга тырышабыз.

- Кайсы җырчы белән дуэт яздырырга теләр идең?
- Җырчылардан миңа  Айдар Галимов бик ошый, мөмкинлек чыкса аның белән дуэт башкарыр идем. Айдар абыйның тавышы һәм җырлау манерасы күңелгә ята.

- Җырлаудан кала Динара кайда эшли? Кайсы профессиональ өлкәдә хезмәт куясың?
- Җырлаудан башка мин хореограф булып эшлим, биергә өйрәтәм, зур тамашаларга биюләр куям. Аннан кала сәнәгать төзелеше өлкәсендә дә эшлим. Төрле юнәлештә үсеш аласым килә. Мөмкинлек һәм теләк булганда барысын да өйрәнергә кирәк.

- Сәяхәт итәргә яратасыңмы?
- Мин бик яратам сәяхәт итәргә. Бу минем хобби. Яңа урыннар ачу, яңа кешеләр белән танышу минем өчен бик кызыклы. Испан телле илләр минем өчен беренче урында, алар минем күңелемә якын.

- Мәскәүдә иҗат итү читен түгелме? Популяр автор-башкаручылар да Казан-Мәскәү арасында яши. Сиңа да Казанда еш булырга туры киләме?
- Бик күп проектлар бүгенге көндә һәм алар барысы да Мәскәүдә түгел. Ара ераклыгында проблема күрмим. Җырчы тормышы йөреп торуны тәлап итә, һәрбер сәфәр үзенә күрә ямь өсти генә. Казанда эш буенча булам һәм бу миңа ошый гына. Шәһәрдә ял итеп йөрүне эш белән көйләү үзенә күрә күңелле.

Фотолар шәхси архивтан алынды.