The Beatles, Ozzy Osbourne, Metallica тыңлап үскән Миләүшә Әхмәдиева татарча лирик җырлар иҗат итә (ИНТЕРВЬЮ)

Миләүшә Әхмәдиева җырларын гитара белән учак янында, романтик атмосферада җырлана торган итеп кузаллыйм. Бу, әлбәттә, яңа гына чыккан “Төнге сәяхәттә” җырына карата әйтелгән сүзләр. Күңелле, кызу җырлар да иҗат итә ул. Әйе, Миләүшә Әхмәдиева – танылып килүче автор-башкаручы. Әлегә тамашаларда бик еш күренмәсә дә үз тыңлаучылары, иҗатын хөрмәт итүчеләре бар аның.

— Миләүшә, автор-башкаручы буларак чыгышларыңны каян күреп була?
—  Тыңлаучыларны иҗатым белән бары бу елның гыйнварыннан гына таныштыра башладым әле. Минем җырларны тик интернетта гына ишетергә була. Чыгышларга килгәндә, концертларда яратып җырлыйм, шулай ук туйларга, төрле мәҗлесләргә чакыралар.
— Җырлар сорап мөрәҗәгать итәләрме? Кайсы артистлар белән эшлисең?
— Әйе, мөрәҗәгать итәләр. Социаль челтәргә җырларны  кертү белән үк шагыйрьләр дә көй язып бирергә, башкаручылар да җыр иҗат итәргә сорап яза. Бу эшкә ныклап алынмадым әле.
— Нинди җырлар белән тәрбияләндең?
— Балачагымда күбрәк халык җырлары истә калган, ә эстрада җырларын алай ук бирелеп тыңламадым. Үземне күпме хәтерлим, өебездә төп музыка уен коралы булып гитара торды. Абыем һәрвакыт чит ил җырларын тыңлый иде: The Beatles, Pink Floyd, Rolling Stones, Queen, Ozzy Osbourne, Metallica һәм башкалар. Аккордлар җыеп гитарага да җырлады. Бераз үсә төшкәч мин дә абыйга ияреп җырлый башладым. Концертларда гел гитарага чыгыш ясый идек. Соңрак үз вокаль-инструменталь ансамбльне оештырдык, җырларны бары русча гына башкардык.
— Һәрбер кеше җырларга ашкына бүген,  ләкин сәхнәгә килеп кергәч күп кенә авырлыклар белән танышырга туры килә. Нинди каршылыкларга очраганың бар?
— Бер юморист әйтмешли, хәзер кемнең авызы бар – һәрберсе җырлый. Минемчә, эстраданың төп проблемасы – акча. Акча юклыгы түгел, ә акчага бәйлелек проблема булып тора. Җырлаудан акча эшләү бүгенге көндә максатка әйләнеп бара. Иҗатны бары коммерция белән бәйләү бөтенләй дә дөрес түгел. Күпчелек, концертларны ерып чыгу өчен, бертөрле, “җиңел” җырларны сайлый. Шундый тенденция булганда сәнгатьнең алга китүе турында бәхәсләр урынсыз. Яңалык юк диләр сәхнәдә, көнбатыш артистларына иярәләр, җырлар бер-берсенә охшаш дип зарланалар. Акча җитмәү сәбәпле минем җырларны да ротацияга  алмадылар, экранга чыкмыйча калган мизгелләр булды. Андый каршылыклар белән үземә шәхсән очрашырга туры килде. Бер яктан караганда контракт булмаса иҗат иреге бар, беркемгә дә бәйләнмәгән. Җырны конвеер системасына салмыйча үз стилемдә, үземә охшаганча эшли алам. Бу бик мөһим минем өчен.
— Син кайсы җырчыларның иҗатын яратсың? Бүгенге эстрадада кайсы башкаручыларның җырлары якын?
— Төрле музыка тыңлыйм, аерым башкаручыларны билгеләп әйтә алмыйм. Кумир булырдай җырчыларым юк. Җырны тыңлаганда, беренче чиратта,  композициянең үзенә игътибар итәргә кирәк, тавышка гына түгел. «Композиция»  сүзе дә бит җырның табигатен ачып бирә. Анда һәр ракурс, һәр мәгънә, һәр деталь мөһим. Тыңлаучы алдына җыр аерым бер әсәр булып килеп басарга тиеш. Ә бу бары тик күңелне, җанны биреп эшләгәндә генә барып чыга.
— Миләүшә, әледән-әле яңа җырлар чыгарып торасың, инде шактый җырлар тупланды. Җырчылар альбом чыгарырга ашкына гадәттә, синекен кайчан көтәргә?
— Кышка планлаштырып торам. Җырлар иҗат ителә, альбом чыгарырга материал тупланды.
— Миләүшә, соңгы чыккан җырың “Төнге сәяхәттә” – лирик композиция. Мондый сагышлы җырларны иҗат итү авырмы? Күңелнең хәлате шундый хисләргә тартыламы?
Юк, киресенчә, нинди генә темага җыр язылуга карамастан, мин  чын-чынлап медитациягә биреләм. Һәрберсен аерым бер хәлаттә язам, транс хәлендә дә дисәк буладыр. Кинәттән генә кереп китәм дә дөньядагы бар нәрсәне онытам. Мондый вакытта әйтерсең күренмәс рәссам алдымда бар дөньямны, бар хисләрне рәсемгә төшерә. Шул илһам дип аталадыр да инде.
Әлеге җырны язганда да алдан җыр язам дип уйламадым. Йокларга ятар алдыннан ниндидер сихри бер көч миңа кәгазь белән каләм биргәндәй һәм шул ук сихри көч җырның сүзләрен пышылдагандай булды. Фәрештәләрме, үземнең эчке тойгыммы – белмим, ләкин җырны тиз һәм күңелемне биреп яздым. Шуңа күрә иҗат итү минем өчен бары ләззәт кенә.
— Кастингларда катнашасыңмы? Кайсы бәйгеләрдә катнашканың бар?
— Әйе, кастингларда катнашканым булды, ләкин барысы һаман финанс мәсьәләсенә килеп терәлә.
— Миләүшә, нинди музыка уен коралларында уйныйсың?
— Гитарада уйныйм. Кылларның тибрәлүе миңа бишектә чакта ук якын иде.
— Иҗат өлкәсендә нинди максатлар?
— Үземнең бер җырыма клип төшерәсем килә. Әлегә кайсысы икәнен әйтмим. Алга таба да иҗат итәргә һәм осталыкны арттырырга теләк.

Фотолар шәхси архивтан алынды.