|
|
Бүген кемнәр туган
|
|
Архив
|
17.08.2016 Җәмгыять
Россия Илбашы Балтач районында яшәүче Хәдичә әбигә хат җибәргәнБалтач районы Чапшар авылында яшәүче Хәдичә апа Камалова 90 яшен камил акыл һәм тән сихәтлеге белән каршы алды, дип хәбәр итә Балтач районының “Хезмәт” газетасы сайты. Хәдичә абыстайны котлап, Балтач хакимиятеннән вәкилләр - район башлыгы урынбасары Наил Сабирҗанов, социаль яклау бүлеге җитәкчесе Алсу Гатиятуллина, мәгариф идарәсе методисты Резеда Гаязова, шулай ук Норма авыл җирлеге башлыгы Тимур Гатауллин килгән иде. Ихлас теләкләрен ирештереп, бүләкләрен һәм Россия Президентының Котлау хатын да юбилярның кулына зурлап тапшырдылар алар.
Озак еллар авыл абыстае булып йөри Хәдичә әби, ә хәзер, яше олыгаеп китү сәбәпле, әлеге эшне дәвамчысына тапшыра.
Лаеклы ялга чыкканчы, мәктәптә җыештыручы булып эшли. Ә аңа кадәр тормыш юлын барлаганда, 15 яшемнән тормыш газабын татыдым, ди. “Куенда 3-4 бәрәңге булган килеш Шәмәрдәнгә барып кайта идек. Симәнәне Арчадан ташыдык. Ындырда ялан тәпи суга идек, чөнки кияргә юк, заманасы шундый булды. Бик күп эләкте безгә. Аллаһы Тәгалә михнәтен дә күрсәтте, рәхәтен дә күрәбез. Без күргәннәрне сезгә күрергә язмасын инде балалар”, - ди сугыштан соң колхозда да тырыш хезмәте белән макталган Хәдичә апа.
1947 елның февралендә Салавыч авылыннан Чапшарга килен булып төшә ул. Мортаза абый белән тигез, матур тормышларында сигез бала табып, аның бишесен генә багу бәхетенә ирешәләр. Калган өч малайлары төрле яшьләрдә гүр иясе булалар. Тормышның әлеге сикәлтәле вакытларын зур сабырлык белән үтеп, киләчәктә якыннарын саклавын үтенә ул Аллаһы Тәгаләдән. Мортаза абый белән 45 ел гомер итәләр, аны караңгы җир куенына салганнан соң, әниләренә терәк-таяныч булып олы улы Нурулла һәм килене Гөлсимә кала. Алар бергә 47 ел яшиләр икән инде. Килен кайнана туфрагыннан ярала диләр, бу очракта да шулай. Сабыр, уңган, әнкәйләрен олуг хөрмәткә төреп яшәтүче Гөлсимә апа төп йортка килүче башка туганнарга да караңгы чырай күрсәтми, һәрчак матур итеп исәнләшеп, кунак итә белә.
Гомеренең тугыз дистәсен үткән әбиебезнең 24 оныгы, 33 оныкчыгы бар. Шуңа да ул үзен бик бәхетле кеше итеп саный.
“90 яшьлек юбилеемны бик бәхетле килеш каршы алам. Бик рәхәттә яшим. Юкса, бот төбеннән аягым сынгач, әҗәлем шушы икән дип уйлаган идем. Үткәннәр генә онытылмый, күңелдә тирән буразна булып ята. Ярый әле ул чактагы газаплар өчен хәзер рәхәтен күрәбез. Ә бит әниләр аны да күрми гүр иясе булды. Шуңа да бүгенге буын балалары тазалык-тынычлыкта яшәсеннәр. Кешене эшсезлек бетерә, эшләп яшәсеннәр”, - ди Хәдичә апа.
Зәлия ХӘСӘНОВА |
Иң күп укылган
|