Чаллыда табибны үтергән Мисбах карт каты режимлы колониягә китерелгән

6 ел да 3 айга ирегеннән мәхрүм ителүгә хөкем ителгән жинаятче пенсионерлар отрядына билгеләнгән. Бу отрядта бары өлкәннәр генә, аларның эш шартлары беркадәр җиңеләйтелгән. Мисбах Сәхабетдиновның 17 мең сум пенсия акчасы аның үзен карау һәм туклану өчен тотыла. Моннан тыш ул үтергән табибның кызына 300 мең сум мораль зыянны капларга тиеш. Әлегә Мисбах Сәхәбетдинов сәламәтлегенә зарланмый.

 

2008 нчы елның 8 июлендә Сәхабетдинов, кул бармагы имгәнүе сәбәпле, 4 нче шәһәр сырхауханәсенә медицина ярдәме сорап мөрәҗәгать итә. Пенсионер әйтүенчә, кабул итү барышында травматолог бабайга түбәтәен салырга куша. Тик ул табиб үтенечен башкарудан һәм кабинеттан чыгып китүдән баш тарта. Нәтиҗәдә, медицина ярдәме сорап килгән бабайны мәҗбүриләп чыгаралар. 2013 нче елның җәендә Сәхабетдинов, үч алу нияте белән, таяк рәвешендә ату коралы һәм берничә патрон ясый. 2014 нче елның маенда ул янә табибка килә, кабинетта таякны эш өстәленә куеп, чакмасына баса, тик корал, төзек булмыйча, атмый. Коралны камилләштереп, 2015 нче елның 11 нче декабрендә Сәхабетдинов янә сырхауханә ишек төбенә килеп, табибны көтә. Иртән эшкә килүче корбанын күреп, бабай атып җибәрә. Күкрәге яраланудан табиб җан бирә. Яр Чаллы шәһәре суды карары нигезендә, Сәхабетдинов 6 ел 3 айга ирегеннән мәхрүм ителде.