ТАБЫШЫГЫЗ, КАВЫШЫГЫЗ

Мөселманнарга бездә дә игътибар арта бара хәзер. Хәләл ризык кибетләре, кафелары бар, мөселман сырхауханәсе, матурлык салоннары ачылды… Алардан да әүвәл башкалада таныштыру-кавыштыру үзәкләре барлыкка килгән иде. «Сөләйман» мәчетендә дә инде җиденче ел шундый үзәк эшләп килә. Күптән түгел алар «Инфо-ислам» мәгълүмат агентлыгы проекты буенча nikahrt.ru таныштыру сайты ачтылар.

– Мондый социаль челтәр булгач, сезгә эш тә калмагандыр инде, – дип мин мәчетнең уку бүлеге мөдире Мәликә ханым ГЫЙЛЬМЕТДИНОВАга мөрәҗәгать иттем.

– Юк, – дип көлә Мәликә ханым. – Эшебез тагын да артты дисәк тә була. Ә сайтны төзегәндә чынлап та эшебезнең кимүенә өметләнгән идек. Чөнки вакытыбыз бөтенләй җитми башлады. Мөрәҗәгать итүчеләр һаман арта, бер-берсеннән ишетеп киләләр, шалтыратып кайчан килик дип сорыйлар. Ә бит аларның һәркайсы белән индивидуаль эшләргә кирәк. Шуннан соң башыбызга безгә сайт төзергә кирәк икән дигән уй килде. Һәм май аенда nikahrt. ru туды. Әмма барысы да сайтка үзе турында мәгълүмат калдырырга, фотосын урнаштырырга ояла, һаман да үзәккә килеп, анкета тутыралар.

– Күбрәк кемнәр мөрәҗәгать итә?

– Бездә бит хәзер ирләргә караганда ялгыз хатыннар күбрәк. Тормышта үз урынын тапкан, үз-үзен тәэмин итә ала торган ханымнар килә. Аларга матди таяныч та кирәкми, ялгыз калудан куркалар. Аннары тагын бер тенденция бар – икенче хатын эзләү модасы китте. Бу байлар арасында гына күзәтелми. Күпхатынлылык Коръәндә рөхсәт ителгән нәрсә, шуңа күрә мин моңа каршы берни әйтә алмыйм. Әмма күпчелек ирләрнең теләсәң, икенчене, өченчене… алырга була дип уйлавы гына күңелне бимазалый. Моның бит икенче ягы да бар. Беренче хатын елап рәнҗеп йөрсә, икенче хатын алу зур гөнаһ була. Өстәвенә мондый никахларның күбесе аерылышу белән тәмамлана. Шуңа күрә ахырын уйларга кирәк. Аллаһы сөбханә вә Тәгалә, сезнең бер хатын белән торуыгыз хәерлерәк, дигән. Ирләргә шулай дип аңлаткач, кире уйлаганнары да бар.

– Ә nikahrt. ru кемнәрне җәлеп итә? – дигән соравыма «Инфо-ислам» мәгълүмат агентлыгы редакторы Данис ГӘРӘЕВ җавап бирде:

– Әлбәттә, яшьләрне. Заманча мөселман яшьләренең аралашуга ихтыяҗы зур. Алар дискотекаларга йөрмиләр, үзләре кебек тәртипле, әхлаклы, иманлы кешене андый урыннарда, урамда очрату мөмкин дә түгел бит әле ул. Таныштыру хезмәте оештыру теләге шуннан туды. Аралашырга теләге булганнар өчен хәзер социаль челтәрләр җитәрлек, әмма аларда хәрам бик күп. Безнең сайтта ул юк. Әгәр дә берәрсе коткы тарату өчен махсус, әйтик, шәрә кеше фотолары элеп куйса, без аны шундук алып атабыз.

– Аңлавымча, челтәрдә аралашкан мөселман кешесе гаилә коруны күздә тота. Сезнең аша танышып гаилә корган парлар бармы әле?

– nikahrt. ru эшли башлап, бер ай үтүгә, мәгълүматымны сайттан алырга кирәк, мин үз парымны таптым дип, егермеләп кеше мөрәҗәгать итте. Ә сайтта аралашырга теләүчеләр булса, аның башка социаль челтәрләрдән аермасы юк. Башта регистрация узарга, анкета тутырырга кирәк, теләмәсәң, фотоңны куймаска да була. Кызлар күбесенчә шулай эшлиләр дә. nikahrt. ru дөньяның төрле почмагыннан торып танышу, аралашу мөмкинлеге бирә. Хәтта Һиндстаннан да керүчеләр бар. Сайт бер урында гына таптанып тормый, аны һаман да уңайлырак итәргә тырышабыз. Бүгенге көндә дизайнын яхшырту өстендә эшлибез. Керегез, аралашыгыз, табышыгыз-кавышыгыз гына.

nikahrt. ru турындагы фикерләр

Илнур:

– Мондый портал күптән кирәк иде. Юкса мөселман егете әдәпле, инсафлы мөслимәне кайдан тапсын?

Гөлчәчәк:

– «Инфо-ислам» мөселманнар өчен бик файдалы эш башлаган. Күптән түгел генә минем иптәш кызым nikahrt. ruда үз парын тапты.

Римма:

– Челтәргә бары тик мөселманнарны гына үткәрәсе иде. Анкетасына ук «аракыны чама белән генә эчәм» дип язган егетләрне эзләп кермибез бит инде без анда.