|
|
Бүген кемнәр туган
|
|
Архив
|
25.07.2016 Мәгариф
Россия вице-премьеры Ольга Голодец халыкка югары белем кирәкми дип саныйБар кешегә дә югары белем алырга димәгән. Россия вице-премьеры Ольга Голодец халыкның 65 процентына мондый гыйлем бөтенләй кирәкми дип саный. Аларга техникумнарда яхшы итеп белем бирү дә җитә. Киләчәктә югары белем кирәк булмаган белгечлекләрнең санын арттырырга җыеналар. Әйтик, система администраторы булу өчен биш ел укып торырга кирәкми. Шулай итеп, техникумнарда элек университетларда гына белем алып булган яңа белгечлекләр булдырылачак. Шул ук вакытта вузларда бюджет урыннарының санын киметмәячәкләр. Һәр теләгән кеше югары белемгә омтыла алачак. Россия мәгариф һәм фән министры Дмитрий Ливанов белдергәнчә, 9 нчы сыйныфтан соң техникумнарга баручы егет-кызларның саны өч ел эчендә ике мәртәбә арткан. Бу сан 40 процентка җитә. “Берничә ел элек укучыларның 20-25 проценты гына техникумнарга укырга бара иде. Алга киткән төбәкләрдә урта һөнәри белем алучылар 50 процентка җитә”, – дип белдергән илнең баш педагогы. Сүз уңаеннан, Татарстанда узган ел 9 нчы сыйныфны тәмамлаган укучыларның 53 проценты техникумнарга укырга кергән. Быел бу санны тагын да зуррак булыр дип көтәләр. Әйтик, Бөгелмәдә ел саен чыгарылыш укучыларының 40 проценты вузга барса, калганнары һөнәри белем сайлый. Татарстанда авиация, машина төзелеше, нефть химиясе, аграр һәм башка юнәлеш буенча ресурс үзәкләре ачылу да вузга җыенучыларның санын киметте.
Яшьләр фикеренчә, техникумда да яхшы белем алып була. “Бөтен кешегә дә югары белем алырга димәгән. Әгәр укучы нинди белгечлек сайлаячагын, кайда эшләячәген, күпме хезмәт хакы алачагын белмәсә, нигә укып торырга?” – дип белдергән иде Татарстан мәгариф һәм фән министры Энгель Фәттахов газетабызга биргән бер әңгәмәдә. Өч көн элек Татарстан Министрлар Кабинетында узган очрашуда Фәттахов бу мәсьәләгә янә тукталды. “Яшьләр, вуз дипломы алса да, эшкә урнаша алмыйлар. Бу дөрес түгел. Бала үстерүнең төрле юллары бар. Һөнәр сайлау мәсьәләсен бала 9 нчы сыйныфта укыганда ук хәл итәргә кирәк. Техникумга барамы ул, мәктәптә 10 нчы сыйныфкамы? Республикадагы ресурс үзәкләрендә сыйфатлы белем алып, яхшы эшкә урнашырга була. Бу үзәкләр эш бирүчеләр белән бергәләп эшли. Студентларның югары белем алу мөмкинлеге дә бар”, – ди ул.
Техникум тәмамлаган яшьләр авылга кайтамы соң? Министр әйтүенчә, укучылар урта һөнәри уку йортларына БДИдан качар өчен бара дигән фикер дөрес түгел. Чөнки 9 нчы сыйныфтан соң уздырыла торган имтиханнар БДИ рәвешендә уза. “Проблема бар, бу бигрәк тә авыл хуҗалыгына кагыла. Бу юнәлештә бездә 20 уку йорты эшли. Сарман, Әтнә, Буа, Актаныш, Мамадышта бик яхшы уку йортлары булдырдык. Безнең үз программабыз бар. Бала авылдан китә икән, аны кире кайтару җиңел түгел. Район башлыкларының киңәшен тыңлап, эшне бергәләп оештырабыз”, – диде Энгель Фәттахов.
Югары белем алу кирәкме соң?
Раил Харисов, дизайнер-программист:
– Мин бүген югары белем алу кирәкми дип уйлыйм. Аның дәрәҗәсе түбәнгә тәгәрәде. Мөгаллимнәр юньләп укытмый, белемне үзеңә алырга туры килә. Укытучылар дәүләт хисабына хезмәт хакы алып ята. Үзем Казандагы техник вузны кызыл дипломга тәмамладым. Минемчә, бүген белгечлекне танышлык буенча сайларга кирәк. Әйтик, әти-әниең, танышларыңның кайда эшләвенә карап. Әниең нотариуста эшли икән, димәк, ул сине шунда урнаштыра ала. Эшкә урнашкач, кирәкле белгечлек буенча үсәргә мөмкин.
Зиннур Закиров, табиб:
– Югары белем алдым дигән булып, диплом күтәреп йөрүчеләр хәзер дөнья тулган. Элек ФЗО, СПТУлар бар иде. Аларда токарь, эретеп ябыштыручы, балта осталары әзерләнде. Бүген халыкның күбесе әнә шул белемгә ия булырга тиеш дип саныйм. Югары белемле кешенең дөньяга карашы да киң булсын иде. Студент вакытта фәлсәфә, сәясәт, икътисад кебек йөзләгән фән укыдык. Хастаханәдә эшләгән бик яхшы шәфкать туташларын беләм. Алар үз эшләрен җиренә җиткереп башкара. Әмма югары белем кирәк дип, кайберләре, эшен ташлап, дәвалау физкультурасы буенча инструкторлыкка укый. Тик андый белгечләр хастаханәләргә күп кирәкми, ә инструктор булып эшләү өчен тәҗрибә кирәк. Шулай итеп, эш таба алмыйлар, кабат шәфкать туташы булырга да теләмиләр. Андыйларны бәхетсез белгечләр дияргә генә кала. Ә табиб югары белемсез була алмый. Аңа гомер буе укырга кирәк.
Сәрия МИФТАХОВА |
Иң күп укылган
|