05.06.2016 Шоу-бизнес
Раяз Фасыйхов Сабан туенда ничек ял иткән?
Эстрадабыз артистлары ил буйлап, дөнья буйлап гөрләгән Сабан туйларында катнашып йөри. Татарстанның атказанган артисты Раяз Фасыйховка да күп төрле тәкъдимнәр килгән. Ул Питрәч районы Татар Тау иле авылында (ТатХодяш) узган Сабан туенда чыгыш ясаган.
– Раяз, тагын кайсы төбәкләргә чакыру кабул иттең?
– 5 июньдә – Арча районы үзәгендә узачак Сабан туйларында катнашырга җыенам. Арчадагы бәйрәмдә дәрәҗәле кунаклар арасында Татарстан Президенты да булыр дип көтелә.
– Артистлар Сабан туенда эшли генәме, әллә ял да итәме?
– Башкалар өчен җавап бирә алмыйм, әмма минем Сабан туенда ял иткәнем юк. Мине артист буларак Сабан туенда катнашырга чакыралар икән, мин ял итмим, ә эшлим.
– Ураза ае башлана. Моңа махсус әзерләнәсеңме?
– Ураза тотам дип әйтә алмыйм, әмма ифтар ашы уздырырга, корбан чалдырырга телим. Ел да корбан чалдырам. Ураза ае – артистлар өчен концертлардан туктап ял итү чоры. Мин исә студиядә яңа җырлар яздырырга планлаштырам. Фирзәр Мортазин һәм башка талантлы шәхесләр тарафыннан иҗат ителгән күп кенә яңа җырларым бар.
– Бүгенге көндә популяр булган "Алма кебек кызарасың" исемле җырыңа клип төшерергә теләмисеңме?
– Клипны Ураза аенда Алмаз Сәмигуллин командасы белән төшерергә җыенабыз. Алмаз – минем туганым да әле ул. Аның эчтәлеге бик кызыклы һәм үзенчәлекле булачак. Клип зәңгәр экраннарга туган көнемә (8 июль – ред.) кадәр чыгар дип өметләнәм.
– Раяз, җәй айларында кайда ял итәргә уйлыйсың? Чит илгә барачаксыңмы?
– Көннәр матур торса, үзебезнең якларда да ял итәргә була. Авылга кайтып, балык тотып, су коену – менә дигән ял! Чит илләргә барырга кызыкмыйм, аның мәшәкате күп. Бәлки Кара диңгез буена Кырымга яки Сочига барып кайтырбыз.