"Татар иле" социаль челтәре 24 майдан бирле эшләми

Миллионнарча сумга ясалган "Татар иле" сайты 24 майдан бирле эшләми. Ни өчен? Билгеле түгел. Әлеге сайтка берникадәр катнашы булган Раил Гатауллин 2015 елның 1 октябрьдән бирле "Татар иле" белән шөгыльләнми икән.

"Сайтның эшләмәвенә бик борчылам, хәтта депрессия дә булды. "Татар иле"н торгызу буенча югары җитәкчелеккә хат яздым, әмма җавап алмадым", - диде Раил "Матбугат.ру" хәбәрчесенә. 

Портал эшли башлаганда аны оештыручылар керүчеләр санын беренче елны ук 2-3 миллионга җиткерәбез дигәннәр иде. Әмма бу фаразлар чынга ашмады. Сайтка күп дигәндә тәүлегенә 600-700 кеше керде. 

Проект бер чыганаклар буенча 15 миллионга, икенче чыганаклар буенча 17 млн сумга эшләнелгән. “Татар иле” социаль челтәре 2015 елның ахырында зур реклама акциясе җәелдереп җибәрде. Күп кенә массакүләм мәгълүмат чараларында түләүле реклама урнаштырдылар. Хәтта Казандагы һәр почта әрҗәсенә диярлек килә торган “Про Город” газетасына да модуль биргәннәр иде (андагы бәяләр шактый кыйммәт). Баксаң, “Татар иле”н рекламалауга гына да 3 млн сум бирелгән булган икән. Ике атна инде сайт эшләми...