Р.Миңнеханов: "Бу бәйрәм татарныкы гына түгел, - ул барыбызны берләштерүче Сабан туе" (ФОТО)

Бәйрәмдә, шулай ук, ТР Президенты ярдәмчесе Ләйлә Фазлыева, ТР Премьер-министры урынбасары - авыл хуҗалыгы һәм азык-төлек министры Марат Әхмәтов, ТР мәдәният министры Айрат Сибагатуллин, Мәскәү, Хабаровск крае, Кырымнан килгән кунаклар һәм башка рәсми затлар катнаша.  

 

Капка төбендә милли киемле гүзәл затлар шәрәфле кунакларны икмәк, тоз һәм татар халкының милли сые чәкчәк белән каршы алды. Мәйданга керү юлында Татарстанның 11 муниципаль районы – Арча, Алексеевск, Буа, Биектау, Яшел Үзән, Кукмара, Лаеш, Мамадыш, Нурлат, Теләче һәм Балык Бистәсе районнары – матур гадәт буенча, республика территориясендә яшәүче халыкның гореф-гадәтләрен, милли үзенчәлекләрен чагылдыруны максат итеп куйган җирле утар күренешләрен тәкъдим итә. Һәр район утарында кунаклар милли бәйгеләрдә катнаша, һөнәрчеләр җитештергән кул эшләнмәләре күргәзмәләре белән таныша.  

 

Татарстан Президенты Рөстәм Миңнеханов рәсми затлар озатуында Арча, Балык Бистәсе, Лаеш, Теләче, Нурлат, Мамадыш, Биектау һәм башка татар утарларына, Алексеевск районы тәкъдим иткән "рус авылына" да кереп чыкты. Арча ишегалдына керер алдыннан, республика башлыгы Сабан туена бүләк итеп, колгага сөлге бәйләде. Аннан кул тегермәнен тартып карады, остаханәләрдә Тукай әкиятләренә нигезләнеп ясалган кул эшләнмәләрен карады.

 

Николай Никифоров чүлмәк вату уенында катнашты.

 

 

Татар утарлары һәркайсы бик матур бизәлгән, районнарның үзләренә хас кәсепчелек эшләнмәләренә һәм күренешләргә бай. Арча районы утарында Кырлай, Тукай дөньясы рухы хөкем сөрсә, Балык Бистәсендә исә күлдә балык тотып утыралар, Теләче утарында яшь тальянчылар каршы ала, Лаеш ишегалдында Чулман елгасы диңгез буларак ясалган, биредә мунча, хәтта аэропорт та бар.

 

Аннан соң Рөстәм Миңнеханов һәм кунаклар ГТО комплексы мәйданчыгына керде.  

 

Сабан туе мәйданда милли бәйрәм тарихи-театральләштерелгән пролог белән тантаналы рәвештә ачылды. Мәмәт хан турында риваять, Габдулла Тукайның "Шүрәле", "Су анасы" әкиятләре сәхнәләштерелгән күренешләр белән озатылды.  

 

Илсур Метшин шәһәр халкын һәм мәркәзебез кунакларын кайнар сәламләп, милли бәйрәм белән тәбрикләде, көтеп ала торган бәйрәм шатлыгын уртаклашырга килгән шәрәфле кунакларга рәхмәтен җиткерде.

 

Николай Никифоров халыкның тырышып эшләп, аннан соң рәхәтләнеп ял итә белүен билгеләп узып, мондый күркәм бәйрәмнең республика, ил өчен горурлык булуын ассызыклады. "Хезмәткә мондый мәхәббәт булганда, безне якты киләчәк көтә бип уйлыйм", - ди министр.

 

Төркиядән килгән кунак Кадыйр Топбаш бүген безнең арабызда булуына шат булуын белдерде. "Сабан туенда өченче тапкыр катнашам. Рәхәтләнеп күңел ачыгыз", - дип мөрәҗәгать итте ул һәм Истанбулда да Сабан туе уздырылуын билгеләп үтте.

 

Аннан соң Милләтләр эшләре буенча федераль агентлык җитәкчесе урынбасары Павел Семенов Игорь Баринов исеменнән сәламләү хатын ирештерде. Анда Сабан туе халкыбызның бай рухи мирасының аерылгысыз өлеше булуы шәрехләнә, бу бәйрәмдә җыр-бию, кәсепчелек, милли аш-суның гармоник төстә берләшүе, быел Сабан туеның бөек шагыйрь Габдулла Тукайның тууына 130 ел тулуга багышлануы, Тукай шигырьләре барлык халыкларга якын булуы әйтелә.  

 

Рөстәм Миңнеханов казанлыларны, башкала кунакларын, бәйрәм белән тәбрикләде. "Барыгызны да иң яраткан бәйрәмебез белән котлыйм, исәнлек-саулык телим. Казанлыларга тырышлыгыгыз өчен зур рәхмәт әйтәсем килә", - дип мөрәҗәгать итте Президент һәм казанлыларга республика үсешенә керткән өлеше өчен рәхмәтен әйтте. Бүген ул Сабан туеның Россиянең 57 төбәгендә, дөньяның 27 илендә үткәрелүен билгеләп үтте. "Бу бәйрәм татарныкы гына түгел, - ул барыбызны берләштерүче Сабан туе",  - диде Рөстәм Миңнеханов.  

 

Рәсми чыгышлардан соң, Сабан туе концерт программасы белән дәвам итте. Раяз Фасыйхов, Ришат Төхвәтуллин, Артур Исламов, Айгөл Хәйри һәм башка җырчылар иң моңлы һәм күңелле җырларын, ТР Дәүләт җыр һәм бию, "Казан" бию ансамбльләре дәртле биюләрен бүләк итә. Мәйданда Сабан туеның колгага менү, авыш багана өстеннән узу, чүлмәк вату, капчык сугышы, катыктан акча эзләү һәм башка мавыктыргыч уеннар халыкны җыйды. Татарча милли көрәш – Сабан туеның төп күркәм мизгеле. Көрәшчеләртәкә һәм җиңел машина өчен бил алыша.  

 

Шуны билгеләп узарга кирәк: Казан Сабан туе Габдулла Тукайның иҗатына багышланган гомуми концепция кысаларында үткәрелә. Бүген шулай ук “Казан” халыкара ат спорты комплексында ат спорты ярышларын тамаша кылырга була.