Бала "ясау" паспорты

Соңгы арада Дәүләт Думасын халыкның шәхси тормышы, бигрәк тә җенси мөнәсәбәтләре борчый башлаган. 16 майда Дәүләт Думасының сәламәтлекне саклау комитеты илдәге ирләрнең бала “ясау” сәләте турында сөйләште. Депутатлар “Репродуктив сәламәтлек паспорты” булдырырга һәм яңа өйләнешүче парларның бала тудырырга сәләтлеме-юкмы икәнлеген тикшереп, шул паспортта билгеләргә тәкъдим иттеләр.

Депутатлар фикеренчә, бала тудыру яшендәге Русия халкының репродуктив (ягъни, бала “ясау”, балага узу, табу мөмкинлеге) сәламәтлеген, бигрәк тә ирләрнекен сакларга кирәк икән. Моннан тыш, репродуктив сәламәтлекне саклау өчен махсус гаилә үзәкләре оештыру, диспансеризация тәртибен үзгәртү дә бик мөһим ди.

Эш шунда, башка илләр белән чагыштырганда Русиядә ирләр бик күпкә иртәрәк, еш кына пенсия яшенә дә җитә алмыйча үлә. Бу исә илдәге халык саны артуга зур киртә булып тора. Бу хакта Русиянең элеккеге баш санитар табибы Геннадий Онищенко узган ел ахырында әйтеп узган булган. Аның фикеренчә, ирләрнең иртәрәк үлүенә хатынкыз гаепле икән. Хатыннар ирләрне “начар кайгырталар”, “тәмәке тартудан, аракы эчүдән сакламыйлар”, “ирләрне гомер буе бала кебек карарга кирәк” икән, имеш.