БДИНЫ ТИКШЕРЕП КАРАДЫЛАР

Ике көн элек республикада чыгарылыш сыйныф укучылары математика буенча БДИ тапшырып карадылар. Бу көнне Татарстанда 126 имтихан кабул итү пункты эшләде, 30 мең 317 укучы сынау узды.

Әлеге тәҗрибә укучыларны һәм, гомумән, әлеге системаны тикшереп карау өчен генә уздырылганлыктан, имтихан нәтиҗәләре буенча билгеләр куелмаячак. Ләкин эшләрнең барысы да тикшереләчәк. Дүрт сәгать дәвам иткән сынауны кемнең ничегрәк узуы атна дәвамында билгеле булачак, дип ышандырдылар Татарстанның Мәгариф һәм фән министрлыгында. Бүген махсус комиссия имтихан эшләрен тикшерү белән мәшгуль, ә укучылар һәм әти-әниләр, котлары алынып, аның нәтиҗәләрен көтә.

Хәер, быелгы чыгарылыш сыйныф укучыларына әллә ни кайгырасы юк. Киләсе ел башына кадәр, ягъни БДИ турындагы закон гамәлгә кергәнче, имтиханны “икеле”гә тапшырган укучы да “өчле” алып чыгачак. Дөрес, өстәмә балл математика, рус теле һәм әдәбият фәннәре буенча гына куела. Шунысы да бар: быелгы имтихан нәтиҗәләре ике ел гамәлдә булачак. Ә хәрби хезмәткә киткән егетләр өчен аның яраклылык вакыты өч елны тәшкил итә. Тагын бер яңалык: быел һәр укучы өчен аерым имтихан пакеты әзерләнгән. Монысы исә күчерүгә юл куймау яки кабатлану мөмкинлеге калдырмау өчен кирәк булды.

Рособрнадзорның яңа җитәкчесе Любовь Глебова белдерүенчә, быел БДИны Россиянең барлык төбәкләрендә дә тапшырачаклар. Димәк, Чечня, Нижгар өлкәсе һәм Приморьеда да бердәм дәүләт имтиханының нәрсә икәнлеген беләчәкләр. Бу төбәкләрдә БДИны әлегә бер генә фәннән, ә калган регионнарда барлык фәннәрдән дә диярлек тапшырып булачак. Бездә исә БДИ сынавын рус теле, татар теле, математика, химия, физика, биология, Россия тарихы һәм җәмгыять белеменнән узарга мөмкин.

Киләсе елдан БДИ һәркем өчен мәҗбүри булачак. Инде берничә ел буе “тикшерү, сынау” узган әлеге системага карата белгечләр һаман да уртак фикергә килә алмый. Бүген БДИга өстәмәләр, үзгәрешләр кертү турында да сүз алып баралар. Белгечләр альтернатив тестлар, экспертлар советы төзү хакында хыяллана. ә укучылар исә БДИ тапшырырга өйрәнә...