Россия олигархы 700 млн сумлык туй ясап улын өйләндергән

Олигарх Михаил Гуцириевның улын ничек өйләндергәне һаман да кешеләрнең тел очында. Икътисадый кризис дип очны-очка ялгап яшәүчеләрнең саны арткан вакытта, якынча 10 млн евролык туй уздыр әле син! Мәҗлестә акчаның хисабы булмаган: кәләшнең 25 кг авырлыктагы күлмәге 1 млн сумга сатып алынган, туй узган бинаны чәчәкләр белән бизәүгә генә 14 млн сум акча тотылган, кунакларның күңелләрен Энрике Иглесиас, Стинг, Патрисия Каас, Дженифер Лопес, Алла Пугачева ачкан.

Стингның гына гонорары 1,5 млн евро булган, аннан башка да бер көтү җырчыга түләгәннәр. Туй, билгеле, бер көн белән бетмәгән, күңел ачу Лондонда дәвам иткән. Кереме якынча 5,9 млрд доллар тәшкил иткән миллиардер Гуцириев кебек сез дә балаларыгызга кыйммәтле  туй ясар идегезме?

Айдар САДЫЙКОВ, танылган тамада:
 
– Искиткеч матур туй булган ул! Кызыгып, сокланып карап утырдым. Әти кеше балаларына онытылмаслык хатирә итеп бәйрәм оештырган. Бу – мактауга лаек күренеш. Әле җитмәсә, ингуш буларак, милли йолаларны онытмаганнар, үз­ләренчә уздырдылар. Күп­санлы туганнары килгән. Һәрбер кунакка истәлеккә дип милли бүләк ясаганнар. Туй гомердә бер генә була, аны никадәр тантаналы итеп ясасаң, шулка­дәр яхшы. Мөмкинлегем булса, мин дә балама шундый туй ясар идем! Әйдә көнләш­сеннәр! Исем китми. Булдыксызлар гына кыйм­мәтле туй дип тәнкыйтьли.

Гөлшат САФИНА, ресторан менеджеры:

– Гуцириевларның мөм­кинлекләре булгач, ни телә­гән­нәр, шуны эшлә­гәннәр. Балаларыма кил­гәндә, андый акча булса да, бу кадәр туй оештырмас идем. Чаманы белергә кирәк, мил­лион евролаганны чит ил артистларына түләү – минем өчен исраф.  Өстә­венә илдә кризис! Халык авырлык белән яши, аларны котырткан кебек килеп чыккан бу туй.

Илфак ШИҺАПОВ, продюсер, журналист:

– Сез нәрсә инде, шундый туй уздырырлык хәл­дәме инде мин?! Стингны чакырып, аңа җыры өчен чыгарып салырлык акчам юк. Балаларым туена шул Илсөя Бәдретдинова гына килсә инде... Ул, ичмасам, акча алмас иде әле.  Дөре­сен әйт­кән­дә, кешеләр нигә туй уз­дырганнарын аңла­мыйм. Кредит алып, бурычка батып, туйлар ясыйлар, бер кич ашыйлар-эчәләр дә бетте. Ярты елдан соң яшь­ләр инде аерылган, ә ата-ана кредит түли. Тукта, фә­ләннәрнең туенда фәлән җырчы булган, без бусын – кыйммәтлесен чакырыйк әле, дип бер-берсе белән узышалар. Шапырыну гына бит бу! Җыелыш син туганнар белән, аша, эч, гармун тартып җырла, күңел ач. Бездә хәзер туй концерт карауга калды. Ачуым кил­мә­гәе, акча туздырып йөри­ләр инде...

Илдар ХӘКИМОВ, җырчы:

– Ишеттек, укыдык ул мәҗлес турында. Андый туйлар уздырырга барыбызга да Ходай мөмкинлек бирсен! Үз көчең белән тапкан  мал икән, тырышып эшләгән акчага ник матур туй уздырмаска?! Әмма мин ул кадәр үк акча сарыф итмәс идем. Гадәттә, әти-әни баласының никахын оештырырга дип төрлечә тырыша, бәйрәмне матур уздыра, ә балалар аның кадерен белми. Туй ничек узуына карап никах озын гомерле, бәхетле буламы әле?! Безне дә туйга җыр­ларга чакыралар, гастроль графиклары белән ки­сешмәсә, барабыз. Билгеле, хәлле кешеләр чакыра. Кү­зәткәнем бар: туйлар күп очракта хәзер хәмерсез уза, әмма купшылыкка омтылу да бар.