|
|
Бүген кемнәр туган
|
|
Архив
|
29.03.2016 Шоу-бизнес
Зөлфәт Зиннуров әтисен искә алу кичәсенә әзерләнәБу көннәрдә җырчы, “Башваткыч” тапшыруын алып баручы Зөлфәт Зиннуров 2 апрель көнне Саба мәдәният йортында узачак әтисен искә алу кичәсенә әзерләнеп йөри. Шамил Зиннур улы Зиннуров 2010 елның 19 гыйнварында вафат булган иде. – Бертуган сеңлем Алия Гайфуллина инициативасы белән әтиебезне искә алу кичәсе үткәрергә уйлыйбыз. Сценарийны ул язды. Әтиебезне белгән, хөрмәт иткән кешеләрне чакырабыз. Әлбәттә, теләгән һәркем кичәгә килә ала, – диде Зөлфәт.
Җырчының әтисе 21 ел буе Саба районы мәгариф бүлеген җитәкли. Аңарчы укытучы булып эшли. Аннары мөдир, директор вазыйфаларын башкара. Россиянең һәм Татарстанның атказанган укытучысы дигән мактаулы исемнәр ала.
– Әтием минем өчен иң дәрәҗәле кеше иде. Бүген дә аның йөзенә кызыллык китерергә куркам. Бөтен кеше дә аның турында зыялы иде дип сөйли, – диде Зөлфәт Зиннуров.
Шамил Зиннур улы Зиннуров 55 яшендә эштә иртәнге вакытта кисәк кенә йөрәге туктап вафат була. Искә алу кичәсенә килергә теләүчеләрне җырчы барысын да чакырып кала.
Зөлфәтнең әтисе Шамил Зиннур улы Зиннуров
Зөлфәт Зиннуров якыннары белән
Эльза ГАЗИЗОВА |
Иң күп укылган
|