Эльмира Кәлимуллина тары боткасы ашап утырган Путинга ничек билет тапшырырга дип баш вата

Бу – Татарстанның атказанган артисты Эльмира Кәлимуллина фикере. Матбугат конферен­ция­сендә ул беренче концерты турында гына түгел, мәдәният өлкә­сендә үзен борчыган проб­лема­лар хакында да сөйләде. 

 

Бүген концерт белән шаккатырып булмый. Студентлар да, үзешчәннәр, профессионаллар да тамашачыны җәлеп итәр өчен ниләр генә кыланмый, нинди генә концерт оештырмый хәзер. Ә менә Эльмирага сольный концерт оештырыр өчен байтак вакыт кирәк булган. Мин моңа “Голос” проектыннан бирле әзер­ләнәм, диде ул.

 

Сөйләүләреннән чыгып, та­машаның затлы булачагын шәй­ләп була. Әйтик, сәхнәгә “Голос” проектының беренче сезонында финалга үткән һәр җырчы чыгачак.

 

– Без ул чакта якынаеп, дуслашып калган идек. Кайчан да булса бергә җыйналу, сәхнәдә берләшү һәрберебезнең хыялы булды. Ул хыял 31 мартта чынга ашачак. Динә Гарипова, Анастасия Спиридонова, Маргарита Позоян һәм мин бергә җырлаячакбыз. “Голос. Дети” проектында финалга чыккан  Сәйдә  Мөхәм­мәтҗа­нова белән буыннар алмашын күрсә­тергә җыенабыз. Миңа Фи­лүс Каһиров та ярдәм итәчәк. Һәрбер концертның нигезе  – ул музыка. Безнең нигез ныклы, әсәрен­дергеч дияр идем мин. Анна Гөлишамбарова җитәкләгән “Яңа музыка” оркестры, пианист Андрей Руденко җыйган төркем аңа биеклек, яңа үр булыр дип өметләнәм.

 

Сәйдә Мөхәммәтҗанова исә “Йолдызлык” фестиваленең рес­публика турына үтүе, “Татар мо­ңы” бәйгесенә әзерләнүе турында сөйләде. Быел ул төрле концертлардан баш тартырга тырыша икән. Моның сәбәбен укуга басым ясавы белән аңлатты:

 

– Мин сигезенче сыйныфта укыйм. Тагын бер елдан имтиханнар башлана. Әти, чананы җәйдән әзерләп куярга кирәк, дип әйтер­гә ярата, мин дә имтиханнарга алдан ук әзер булырга телим. Җыр күп көчне ала, шуңа күрә “биш­ле”ләр янәшәсендә “дүртле”ләр дә алам. Укытучылар җырлый дип кенә билгене күтәрми, мин дә моны кабул итә алмас идем. Җыр – минем гомерлек юлдашым. Сәхнәгә һәрчак озын толымлы, милли киемле кыз булып чыгачакмын. Нәрсә генә дисәләр дә, әлеге образдан баш тартырга теләмим. Әмма җыр – җыр белән, минем ки­ләчәктә берәр җитди һөнәр дә үзләш­терәсем килә. Шуңа күрә 11 сыйныфка кадәр укып бете­рергә уйлыйм.

 

Очрашуга Маргарита Позоян да килгән иде. Ул Эльмираның, Сәйдәнең татар моңында үсүләре турында сөйләгәннәрен сокланып тыңлады. “Аларга карап үз кимчелегем турында да әйтми булдыра алмыйм. Мин Эльмира, Сәйдә кебек үз телемдә иркен сөйләшә алмыйм.  Моның зур югалту икәнен аңладым, киләсе очрашуда әрмәнчә сөйләп күр­сәтергә хыялланам. Хәзер мин сезне үз телемдә сәламлим. Ул – бик матур, сыгылмалы тел”, – диде Маргарита.

 

Эльмира нык дулкынлануын, төшләренә дә шушы концерт ке­рүен сөйләде. “Беркөнне тө­шем­дә Владимир Путинны күр­дем. Минем каршымда тары боткасы ашап утыра икән. Шуннан, ниш­ләп миңа чакыру билеты юк, дип сорады. Менә хәзер ничек аңа чакыру билетын тапшырырга дип баш ватам”, – дип көлдереп тә алды.

 

Тамашачыны ниләр белән шаккатырырга уйлыйсыз дигән сорау исә җырчыга бөтенләй оша­­мады:

 

– Без фәкать җыр, тавыш бе­лән генә шаккатырырга җые­на­быз. Алайса, ияләштеләр нәр­сә­­­дер шартлатканга, нәрсәләр­нең­дер очып китүенә, гитара эченнән кеше атылып чыгуына. Нәрсәгә кирәк бу? Концертка “Дю-Солей” циркының ни катнашы бар? Җыр­ны бәяләү бөтенләй онытылдымыни?

 

Эльмира Кәлимуллина чын җыр нинди була дигән сорауга җавап бирергә  һәм бәя алырга омтыла. Чын җыр дигәнгә татар халык җырларын кертүе һәм концертта татар җырларының да булуы чыннан да сөендерде.