Гонорар алган пенсионерларга пенсияне арттырмаганнар?

Көн тудымы берәр хәл килә дә чыга. Менә тагын бер күңелсез яңалык – эшләүче пенсионерларның пенсияләрен арттырмау турында күптән түгел кабул ителгән закон безнең авторларга да китереп суккан икән. Белгәнебезчә, февральдән пенсияләр 4 процентка артты. Безнең пенсиядәге авторларыбыз да, билгеле, артып килгән пенсияне алабыз дип өметләнгәннәр, әмма...

Шушы көннәрдә алар редакциягә чылтырата башладылар. “Пенсия китергәннәр иде, ләкин “Татарстан яшьләре”нә язгач һәм гонорар алгач, без сездә эшлибез дип саналабыз икән, шуңа пенсиябезне арттырмаганнар, нишләргә дә белгән юк”, – дип гаҗәпләнүләрен һәм борчылуларын белдерделәр алар. “Болай булса, мәкалә яза алмабыз инде, аны ай саен язып булмый, ә пенсия ай саен килә, бераз гына артса да, аннан колак кагасы килми бит”, – диделәр.

Аптырап, РФ Пенсия фондының Татарстан бүлегенә чылтыраттык. Матбугат үзәгендә безгә болай аңлаттылар: “2015 елның 30 сентябренә кадәр эшләгән пенсионерларның пенсияләре артмады, сез үзегезнең авторларыгызга гонорарны конверт белән генә бирмисез бит инде – бу законсыз булыр иде, ә ниндидер килешү буенча түлисездер бит, димәк, алар сездә килешү нигезендә эшләүче пенсионерлар булып саналалар. Тулырак аңлатма өчен аларга үзләренең җирле Пенсия фондларына мөрәҗәгать итәргә кирәк”.

Менә сиңа мә! Эчең пошканда, йөрәгең янганда редакциягә хат язып салу да эшкә керә икән бит! Дөрес, мәкалә язу башларны әйләндерә, йокыны качыра, бөтен уйларыңны били торган бик зур, авыр эш ул. Ләкин, аек акыл белән уйлаганда, ил-көн вакыйгаларына, яшәешкә битарафлык күрсәтмәгән, үз фикерләре белән уртаклашкан, әхлаксызлык чәчәк аткан бүгенге заманда бүтәннәргә җан азыгы, тәрбия биргән өчен авторларга өстәп акча түләргә кирәк бит! Ә дәүләт нишли? Язмасыннар ди, күрәсең. Язмасыннар да, укымасыннар да дигән фикердә бугай акча санаучылар. Почта, кәгазь, типография чыгымнарын арттырып, газеталарны авыр хәлгә кую, аларны язылу бәясен арттырырга мәҗбүр итү, шул рәвешле укучыларны газетадан биздерү генә җитмәгән, инде газетага язучы пенсионерларның кесәләрен капшый башладылар. Вакытында эшлисен эшләгән, лаеклы ялга чыккан пенсионерларыбыз сәүдә итеп баеп ятмыйлар, кризис дигәч тә, айга 150-200 сумлык мәкалә язган өчен олы кешеләрне 400-500 сум пенсиядән мәхрүм итәргә кирәкми бит инде!

Газетага мәкалә язу ул бит завод яки фабрикада эшләү түгел, ул илһам, иҗат дигән сүз. Әгәр пенсионер моңланып китеп, үз алдына җырлап җибәрсә, пенсия фонды моның өчен аның акчасын киссенме? Болар турында уйлагач, әлеге гамәлләр бары бер нәрсә – карт-коры хисабына экономия ясау өчен генә эшләнә дигән нәтиҗәгә киләсең.

96 яшьлек “Татарстан яшьләре”нә газета укучылар гомер буе язды. Күңел кушуы буенча, рухи ихтыяҗ тойганга яздылар һәм әле дә язалар. Авторларга рәхмәт йөзеннән редакция аларга кул хакы – гонорар түли. Әлләни күп сумма түгел ул. Әмма, күргәнегезчә, дәүләт шул акчаны да күпсенә икән. Мондый хәлнең булганы юк иде әле. Шулай да без язу белән бер агуланган кеше инде язмый тора алмас, дәүләт аерырга тырышса да, яраткан, кадерле авторларыбыздан аерылмабыз дип өметләнәбез.