Түрәнең ришвәт алуын илгә хыянәт итүгә тиңләмәкчеләр

Дәүләт Думасындагы “Единая Россия” фракциясе депутаты, ришвәтчелеккә каршы комитет әгъзасы, элеккеге ФСБ башлыгы Николай Ковалев эре чиновникның ришвәт алуын илгә хыянәт итүгә тиңләргә кирәк дип саный. Баксаң, мондый закон проекты әзерләнеп ята да икән инде.

Гамәлдәге законнар нигезендә, дәүләткә каршы эшләнгән җинаятьләр өчен 12 елдан алып 20 елга кадәр иректән мәхрүм итү каралган. Әгәр бу яңа инициатива тормышка ашса, губернаторларның, тикшерүчеләрнең, прокурорларның һәм судьяларның ришвәт алулары илгә хыянәт итү дип саналачак һәм аларны озак вакытка төрмәгә ябарга мөмкиннәр (хәзерге законнар буенча түрәләрне, күп дигәндә, 10 елга гына ябалар).

“Югары пост биләүче кеше үзенең ришвәтчел гамәлләре белән дәүләт мәнфәгатьләренә, илнең иминлегенә зыян салганын аңларга тиеш”, – ди депутат.

Ләкин экспертлар “Единая Россия” әгъзасының бу инициативасы сайлау алды рекламасы гына дип саныйлар. “Проблеманы болай хәл итеп булмый, – ди Икътисадый һәм сәяси реформалар үзәге җитәкчесе Н.Миронов. – Хәзер дә Җинаять кодексында ришвәтчелек өчен җәзалар шактый кырыс. Әмма бөтен бәла шунда – җаваплылыкка тарту механизмнары эшләми, моның шулай икәнен “Сердюков эше” күрсәтте инде. Әгәр кешене аклыйлар яки төрмәдән вакытыннан алда чыгаралар икән, моны зурдан кубып, дәүләткә хыянәт дип атаудан ни файда?”