Самарада «Сәләт» лагеры булачак

Шәһәр мәктәпләре грипп авыруыннан карантинга ябылып торган вакытта да Самараның «Яктылык» татар мәктәбе укучылары белем алудан туктамады. Тик дәресләр мәктәп бинасында түгел, ә шәһәр шау-шуыннан еракта, табигатьнең матур кочагында урнашкан «Космос-2» лагерында үтте. Укудан тыш, балалар биредә иптәшләре, укытучылары белән рәхәтләнеп ял да иттеләр әле.

Бу проектның уңышлы булуына баштан күпләр бик ышанып бетмәсә дә, хәзер инде бөтен мәктәп белән лагерьга бару балаларга яхшы тәэсир итү белән берсе дә бәхәсләшми.

- Өйдә балалар күбрәк компьютер артында яисә телевизор карап вакыт үткәрәләр. Ә лагерьда алар рәхәтләнеп бер-берсе белән аралашалар, саф һавада ял итәләр. Дәресләреннән буш вакытта кызыклы, файдалы эшләр белән дә шөгыльләнәләр. Кемдер шигырьләр яза, кемдер фән белән кызыксына, ә кемдер спорт белән шөгыльләнә, - дип сөйли “Яктылык” мәктәбе уку¬чыларының ата-аналар комитеты рәисе Әмир Марадуллин.

“Яктылык”лыларга ял вакытында Казаннан кунаклар да килде. Бу Татарстанда күп еллар эшләп килүче “Сәләт” клубы активистлары һәм аның президенты Айгөл Габдрахманова иде.

- Бу яшьләр оешмасы укытучылар инициативасы белән 1994 елда барлыкка килгән. Ул Татарстан Республикасының дәүләт органнары җитәкчеләре ярдәме белән оештырылган һәм бүген талантлы балалар һәм яшьләр белән уңышлы гына эшләп килә. Безнең укучыларыбыз арасында да “Сәләт”  лагерында ял итүчеләр бар. Барсы да аның турында исләре китеп сөйлиләр. Шуңа күрә без бу лагерьны Самарада да оештырырга булдык, һәм менә бүген “сәләт”леләр бездә кунакта,  - дип сөйләде тәрбия буенча мәктәп директоры урынбасары Инзилә Гыйззәтуллина.

Кунакларны каршы алу тантанасында Айгөл Таһир кызы Габдрахманова клубның эшчәнлеге белән таныштырып узды.
“Сәләт” оешмасының төп бурычы - сәләтле балаларны берләштерү, аларның талантын үстерү. Татарстанның төрле төбәкләрендә безнең 15 клуб эшләп килә, шулай ук Башкортостанда, Чувашиядә дә “сәләт”леләр бар. Самарада да бу проектка карата кызыксыну уянганга без бик шатбыз һәм бүгенге көндә аны чынга ашыру өчен актив эшчәнлек алып барабыз.

Самарага юлга чыгар алдыннан без Татарстанның премьер-министры Илдар Шәүкәт улы Халиков белән аралашып, үзебезнең планнарыбыз турында сөйләдек. Ул да моңа бик куанды һәм эшебездә уңышлар теләде, - дип сөйләде Айгөл ханым. - Безнең төрле юнәлештә уңышлы эшләүче лагерьларыбыз бар. Мәсәлән, фән белән кызыксынучылар - “Раушан”, мәдәнияткә мөккибән киткәннәр - “Рухият”, ә компьютер технологияләрен яхшы шәйләүчеләр “Санак” сменасында ял итә алалар.

Чараның мөхтәрәм кунагы өлкә мөселманнарының Диния нәзарәте рәисе, мөфти Талип хәзрәт Яруллин Айгөл Габдрахмановага һәм аның командасына Самарага килгән һәм балалар белән кызыклы программа уздырганнары өчен рәхмәт сүзләре әйтте. Укучыларга мөрәҗәгать итеп:
- Үзегезне камилләштерегез, дөнья белән танышыгыз, аралашучан һәм актив булып үсегез. Бөтен мәктәбегез белән лагерьда ял итүегез дә бу күнегүләрне үстерергә ярдәм итәчәк. Киләчәктә дә, һичшиксез, монда кабат ял итәргә теләгегез булыр дип өметләнәбез, - дип белдерде ул.
Самараның “Яктылык” татар мәктәбе директоры Радик Рәфгать улы Газизов та укучыларны җылы кабул иткән, аларга рәхәтләнеп ял итәргә мөмкинчелек тудырган “Космос-2” лагеры җитәкчесе Эльвира Эркин кызы Симашевага үзенең рәхмәт сүзләрен әйтте.

Казаннан килгән кунаклар “Космос-2”дә дүрт көн яшәп, укучылар белән аралаштылар, алар белән спорт ярышлары, “Что? Где? Когда?”, “Интуиция” кебек интеллектуаль уеннар уйнадылар, төрле тренинглар үткәрделәр. Очрашу укучыларга да, укытучыларга да бик ошады. Икенче елга Самарада да “Сәләт” лагеры оештырылыр,  дигән өмет белән “яктылык”лылар мөхтәрәм кунакларны Казанга озаттылар.

.
РӘСЕМДӘ: “Сәләт” клубы активистлары чыгыш ясый.