Габделфәт Сафин: Клип җырының сүзләрен подвал чистартканда таптым (ВИДЕО)

Бу көннәрдә Габделфәт Сафин “Мәхәббәтне саклыйк” җырына клип төшерде. Барлык съемкалар Казанда узган. Әмма җырчы кайсы өйдә төшерүен сер итеп калдырды. Җырның барлыкка килү тарихы да кызыклы. Гадәттә Габделфәт Сафинга концерты вакытында тамашачылар үзләренең шигырьләрен бирә. Җырчы аларның барысын да җыеп, туплап бара икән.

– Тамашачымның “Мәхәббәтне саклыйк” шигыре өйнең подвалын чистартканда дисклар эченнән килеп чыкты. Бу шигырь халәтемә туры килгәч, тормышыма да туры килә дигән сүз. Әлеге шигырьгә көй язуын үтенеп, җырчы, композитор Ринас Әхмәтовка мөрәҗәгать иттем. Икенче көнгә үк язып бирде. Шунысы кызык: Ринасның ул көнне баласы туган иде, – диде Габделфәт Сафин.

Гадәттә, клип төшергәндә танылган артистларны уйнаталар. Бу клипта җырчы үзеннән башка кешене күрмәгән. Җырда игътибарны башка кешеләр җәлеп итәргә тиеш түгел иде, ди җырчы. Үзе генә башкарып, мәхәббәтне аңлатып бирергә булган. Үзе генә ничек төшә алган? Мәхәббәтне бер кеше генә аңлатып бирә аламы? Бу сорауларга җавапны “Мәхәббәтне саклыйк” клибыннан таба алырсыз. Әлегә премьерадан түбәндәге өзекне карагыз.