“Аңгышабыз, сүлә татарца!” - Мәскәүчә бәби туен карап кайттым

Мәскәүдә яшәүче дусларым – Сергач татарлары бәби туена чакырдылар. Бик теләп юлга кузгалдым. Һәр авылның үз әттәхияте диләр, кызык бит: Мәскәүдә ничегрәк уза икән бәби туе? Хуҗабикә Адлия Харис кызы алдан ук әйтеп-аңлатып куйды: “Бездә гадәт шундый: һәр гаилә бала туу белән, мулладан азан әйттереп, исем куштыра.

Озын-озакка сузмыйча, ир баланы биләүдә чакта ук сөннәткә бирә. Бу – әби-бабайлардан килгән гадәт. Һәм аны беркем үзгәртми. Яшь гаилә бераз хәл алгач, бөтен нәсел-ыру бәби туена чакырыла. Бәби тәпие юу түгел, ә сабыйның тәүге туе – хәмерсез һәм мулла чакырып, Коръән укып, аның догасы, хәер-фатихасы белән уза”.

...Туганнарны очраштыруның, бүгенге мәҗлестә шатлык-сөенеч уртаклашуның сәбәпчесе булган 5 айлык Данир әле әтисе, әле әнисе кулында юмарт елмая. Гөнаһсыз сабый карашы дөнья мәшәкатьләрен оныттыра. Яшь әни күп халык арасында күз тимәсен дип, улының маңгаена кара сызык сызгалаган. Үз алдыма елмаеп та, куанып та куйдым: әби-бабайлардан килгән ырым инде бу. Мәскәү кызы, булачак табиб Эльвира да, искелек калдыгы дип йөз чөермәгән, алдан хәстәрен күргән. Баласына су бирәме, ризык каптырамы, яшь әни “бисмилла”сын кабатлый – каенанасы Адлия биргән тәрбия дәресләре нәтиҗәсе. Кунаклар сый-нигъмәттән сыгылып торган табынга кереп урнашуга, Ислам хәзрәт Вәлитов якташларына сорауны кабыргасы белән куйды: кайсы телдә аралашыйк? “Татарча аңгышасызмы?” – диде ул, табын тутырып утырган яшьләргә борылып.