05.02.2016 Шоу-бизнес

Фәридә Төхватуллина: “Һай, үлеп яратам”, дип кияүгә чыкмадым” (ФОТО)

“Яңа Гасыр” каналында “Сиңа миннән сәлам” тапшыруын алып баручы Фәридә Төхвәтуллина сыер да сава, терлек-туар да карый, кирәк булса утын да яра. Кыскасы, кара эш дип чирканып тормый, ниндие бар – бөтенесен башкара. “Башыңа төшсә, бөтен эшне өйрәнәсең, эшнең ояты юк”, – ди ул.

– Фәридә, ирең Илшатка яратып кияүгә чыктыңмы?

– Тора-бара ярата да башлыйсыңдыр. Кияүгә чыкканда, һай, мин моны үлеп яратам, дип чыкмадым үзе.

– Ник алай?

– Ярату тора-бара килә дип уйлыйм. Акыл белән уйлап, сине яраткан, хөрмәт иткән кешегә кияүгә чыгарга кирәк. Икең бер фикердә булу кирәк. Сөйләшергә уртак тема булмаса, коры ярату белән генә яшәп булмый, юллар аерыла ул. Иремнең хатын-кызны хөрмәт итүе, аңлый белүе ошады. Нинди хәл булса да аңа таянам.

– Илшат 122нче рус гимназиясендә физкультура укыта икән, бу акчага гына яшәп булмыйдыр инде ул, бизнесы бармы?

– Әйтмим. Серләр калсын әле.

– Ә син “Сиңа миннән сәлам”не алып барып, череп баеп беткәнсеңдер инде, шулаймы? Анда “Видеокотлаулар” 5200 сум, өй телефоныннан язып алынган бер хатның бәясе 2300 сум тирәсе, диләр.

– Алай акча артыннан куа торган кеше түгел мин. Күңел халәтемә туры килгән эш булсын.

Алар бер-берсенә “бәгърем” дип эндәшә. 2 класста укучы олы кызлары Мәликәне мәктәпкә илтү, алып кайту әтисе карамагында. Кызлары да әтиләре эшләгән гимназиядә белем ала.

– Балачагың ничек узды?

– Әтием Әтнә районы Олы Мәңгәрдән, шул авылда дөньяга килгәнмен. Әниемә колхозның баш хисапчысы эше тәкъдим ителү сәбәпле, әниемнең туган авылы – Арча районы Яңа Иябаш авылына күченеп киткәнбез. Балачагым шунда үтте. Әни мөстәкыйль бала итеп үстерде: “Авыр хәлдә калсаң, иң беренче Аллаһы Тәгаләгә таянып, аннан көч-куәт сора”, – дип өйрәтте. Әнием Хаҗирә бүген дә шул авылда гомер итә. Әтием Фердинанд 55 яшендә инсульттан вафат булды. Ул үлгәндә 27 яшемдә идем.

– Энекәшең Фәннурга – 23, арагыз 12 яшь икән, ник алай?

– Әнидән энекәшемне: “Үзем генә калам”, – дип сорап алдым. Авыл хуҗалыгы университетында урман хуҗалыгы буенча укый ул, соңгы елы инде.

Туган якка атна саен кайтабыз, минем якка күбрәккайтырга туры килә, әти булмагач хуҗалык эшләре җыела. Терлек-туар, тавык, казлар асрый әни. Ирем ягыннан әткәй-әнкәй Әтнә районы Чишмәле Сап авылында яшиләр.

– Әйбәт киленме син?

– Әйбәт кабул иттеләр, “кызым”, дип кенә эндәшәләр. Чит кешенең баласына “кызым” дип әйтү җиңел микән? Күмәк эшләр булганда, миңа да шалтыратып киңәшәләр, күңелем үсеп китә. Ашлар уздырганда үзем дә алар белән киңәшләшәм. Безнең ике авыл арасы 50 чакрым гына, безгә кайтканда, аларга да сугылып чыгабыз.

– Кайткан саен мунча керәсеңме?

– Мунча яратам. Ирем – мунча белгече. Ишегалдында күмер самавыры кайнатабыз, аны төп йорттан таптык. Әниемнең бала чагындагы самавыр ул.

– Чабынасыңмы?

– Чабынам. Юкә, имән, каен себеркесен яратам. Себерке әзерләргә әти, балалар белән бергәләп менәбез. Шунда ук бәйлибез, үләннәр дә җыябыз.

– Печән дә чабасыңмы?

– Юк, карап кына торам.

– Илшат белән танышу ничек булды?

– Тулай торакта дүрт ел яшәдем. Хорга йөри идем, концертта таныштык. Илшат та шул ук торакта яши иде. Студентның акчасы бетә, ә Илшатта гел акча була. Булмый хәле юк, спорт факультетында укыгач, төрле ярышларда катнаша, призлар ота, эшли дә иде. Очрашып йөрдек, әмма гаилә кору турында уй юк иде. Язмыш соңыннан тагын очраштырды, ике ел йөрдек тә кавыштык. Список лучших лицензионные казино Украины вы найдете на этом сайте.

– Тел байлыгыңны үстерү өчен нишлисең?

– Әдәби китаплар укыйм.

– Йокларга яратасыңмы?

– Биш-алты сәгать йокы җитә миңа. Бишенче яртыда уянып, иркенләп җыенам, алтынчы яртыда безне машина килеп ала.

– Сезнең тапшыруны гел тәнкыйтьләп торалар: “Артистларны сөйләтмәгез, күбрәк котлаулар укыгыз”, – диләр.

– Тәнкыйтьне яратам. Мактаган дустыңнан курык, диләр.

– Ачуың чыкмыймы?

– Юк, бик тыныч кабул итәм.

– Син тамашачылар белән “Саумысез” дип исәнләшәсең, ник?

– Чит илдәге тамашачыларны да күз алдында тотам.

– Эфирга чыгар алдыннан дога кыласыңмы?

– Һәрвакыт “зиһен, тел ачкычлары бир, яман нәрсәдән сакла”, дип, Аллаһы Тәгаләдән сорыйм.