28.12.2015 Җәмгыять

Назилә Сафиуллина "аслы-өсле" фатирда булып кайткан (ФОТО)

Башкала халкын, кунакларны, туристларны җәлеп итү өчен Казан нәрсәләр генә уйлап чыгармый! Аеруча үзәк урам Бауманда күп андый шаккатыргычлар. Беркөнне интернетта казынып утырганда шундагы асты өскә килгән фатир сурәтләренә күзем төште. Шәһәребезнең үзәк урамында күптән булган юк иде, түшәмгә ябышкан диван-суыткыч-ванналарны да күреп кайтырмын дип, шунда юнәлдем.

Дөньяның асты өскә килгән дигәннәре шушы буладыр инде: “Дом вверх дном” дип аталган бу йортта идәндә торырга тиешле бөтен әйбер түшәмгә менгән, ә түшәм, люстралары белән, идәнгә төшкән. Алгы бүлмәдәге шкафлар, аяк киемнәре, велосипед, вак-төяк, балалар бүлмәсендәге уенчыклар, шкаф-тумбалар, бәдрәф һәм юыну бүлмәсендәге ванна, унитаз, раковина, шкафлар, залдагы журнал өстәле, диван, телевизорлы киштә, кухнядагы гарнитур, өстәл (ашамлыклары белән бергә), урындыклар, суыткыч, аның өстендәге тутый кош читлеге, микродулкынлы мич, савыт-саба – барысы да түшәмгә менеп кунаклаган. Гөлләр, тәрәзәләр дә йөзтүбән карап тора, хәтта суыткычтагы, өстәл-шкафтагы ризыкларга, бүлмәләрдә шкафка таслап тутырылган киемнәргә, ванна бүлмәсендәге шампунь, көзге алдындагы фен, тарак, иннек, чәч кыстыргычларга кадәр асты-өскә урнашып, башыңа коелам дип торалар. Картиналар да әйләнгәннәр, телевизор да йөз-түбән күрсәтә. Кызык! Әмма кыйммәт – өч бүлмәле әлеге йорт-фатирны карап чыгу – 300 сум.

Мин аны тамаша кылып чыкканда аналы-кызлы икәү аптырашып торалар иде: мәктәптә укучы кызга физика дәресеннән шушы “аслы-өсле” фатирда фотога төшеп, сурәтне алып килергә кушканнар икән. Ә фотога төшү өчен анда ике кеше керергә кирәк. “Икәү керү өчен безнең 600 сум акчабыз юк”, – ди кызның әнисе. Физикадан шундый сәер өй эше бирүләренә гаҗәпләнеп, “икеле” ала күрмәсен дип, йөз-түбән килгән фатирны әлеге татар кызы белән тагын бер кат әйләнеп, аны фотога төшереп чыктым.

Монда әлеге фатирдан тыш, “Курку лабиринты” белән “Көзгеле лабиринт” та бар икән. Аларында да булдым. Газетага язар идем дигәч, “Курку лабиринты”н җәелеп китеп сурәтләмәскә куштылар: газетада болар хакында инде укыган кешеләрнең барып күрәселәре килмәс, диделәр. Ә мин анда тәфсилләп язарлык нәрсә күреп тә, аңлап та өлгермәдем: караңгы коридорлардан куркып атлаганда түбәләргә, диварларга эленгән пәрәвезләр һәм ниндидер хәшәрәтләр генә күзгә чалынды. Әйе, куркыныч, аеруча, көтмәгәндә каршыңа эшләп торган пычкы белән берәү килеп чыкканда йөрәгең табаныңа төшеп китә. Бу аттракционга аеруча яшьләр, балалар яратып йөри икән, җыен куркыныч, хәшәрәт, фантастик – тузга язмаган уен-фильмнарны карарга аларга куш бит инде.

Салават күпере кебек төрле утлар белән яктыртылган, көзгеләр уратып алган лабиринтта йөргәндә көзгегә бәрелмәс өчен кулга резин пирчәткә кияргә киңәш итәләр (алар өстәлдәге тартмага салып күпләп куелган). Кая карасаң да көзге, матур, рәхәт кенә көй уйнап тора. Күңеле кызык эзләгән кеше 200 сумга кереп карый ала. “Йөзтүбән йорт”ка һәм лабиринтларга бер килүдә керсәң, билетны ташлама белән бирәләр.

“Көзгеле лабиринт”ка кергәндә аттракционнар хезмәткәре фотога төшерә һәм чыкканда сурәтең төшерелгән кечкенә генә ике магнит тоттыралар. Теләсәгез, алыгыз, берсе 200 сум диләр. Аласыңмы-юкмы – ихтыярың.

Бауманда тагын “Иллюзияләр музее”на кереп, бик матур, ачык төсләр белән эшләнгән 3D картиналарны тамаша кылырга, “Алып йорты”на (Дом великана) кереп, Пермь, Ульяновск, Мәскәү, Санкт-Петербург, Ярославль осталары ясаган коточкыч зур әйберләр янында үзеңнең нинди кечкенә кеше икәнеңне белеп, шаккатып йөрергә, ике аттракционда да фотога төшеп кинәнергә була икән. “Иллюзияләр музее”нда балалар һәм үсмерләр телевизордан яратып карый торган “Симпсоннар” мультфильмы геройларына татар түбәтәйләре кидертелгән сурәт тә бар, алар үз яннарына диванга утыручыларны өчпочмак, чәкчәк белән “сыйлыйлар”. Бу музейне оештыручылар милли колорит өстибез дип тырышсалар да, милли бизәгебез саналган түбәтәйне, милли ризыкларыбыз чәк-чәк белән өчпочмакны хәшәрәт, кыяфәтсез Симпсоннар белән болгатуларын күңел барыбер кабул итми...

Кыскасы, премия алгач яки авылда унлап каз яисә берәр бозау суеп саткач, балалар белән рәхәтләнеп акча туздырып кайту, күңел ачу, социаль челтәргә куяр, дусларга-танышларга күрсәтергә фотога төшү өчен Бауман урамында кызыклы урыннар җитәрлек.

Назилә САФИУЛЛИНА
Татарстан яшьләре
№ --- | 28.12.2015