28.12.2015 Җәмгыять

100 мең сумга бөтен татар язучысын сайтлы иткәнче һәркайсына миллионнар түгү отышлырак? (Мин ничек грантта катнаштым)

“Ник грантларда катнашмыйсың син?” дип сорыйлар миннән еш кына. Грантларның ничегрәк уйнатылганын чамалаганга күрә. Шушы көннәрдә үз гомеремдә беренче тапкыр грантта катнаштым. Нәтиҗәсе бик кызык. Укыгыз:

«2014-2020 елларга Татарстан Республикасы дәүләт телләрен һәм Татарстан Республикасында башка телләрне саклау, өйрәнү һәм үстерү» дәүләт программасы турында ишеткәнегез бардыр. Әлеге программа кысаларында “Тере тел – тере милләт” дигән бәйге уздырыла. Шунда “Иң яхшы Интернет проект” дигән номинация бар. 1 урын өчен 110 мең, 2 урынга – 80, өченчегә 60 мең сум бирәләр. Ни өчен мин бу грантта катнашып карарга булдым? Беренче чиратта, суммалары адекват булганы өчен. Миллион сумлы грантлар миңа эләкмәячәк, ә бу “вак-төякне” бирергә мөмкиннәр.

Минем проект нидән гыйбарәт иде?

200 мең сумга (шуның яртысыннан күбрәген әле үзем финансларга әзер) һәр татар язучысына шәхси сайт ясау. Сайтларның шаблоны бер үк, әмма адресы, эчтәлеге, “шапка”сының дизайны - барысы да индивидуаль. Хостинг, рекламалау, сайт белән эшләргә өйрәтү, консультация – барысын да бушка тәкъдим итәргә әзер идек. Әмма минем проект тормышка ашмады. Хәтта, 30 мең сум да бирмәделәр. Гәрчә, бу номинациядә нибары 9 гариза катнашкан. Һәр татар язучысын сайтлы итәргә кирәк тапмадылар.

Әлбәттә, бу проект тормышка ашса, моннан соң татар язучылары сайтларына миллионлаган акчалар түгеп булмас иде. Хәтерләсәгез, Габдулла Тукай сайты 2 млн сумга ясалды. Шул ук вакытта, 15 миллионга (кайбер чыганаклар 17 млн ди) эшләнгән “Татар иле” социаль челтәре 2015 елның ахырында зур реклама акциясе җәелдереп җибәрде. Күп кенә массакүләм мәгълүмат чараларында түләүле реклама урнаштыралар. Хәтта Казандагы һәр почта әрҗәсенә диярлек килә торган “Про Город” газетасына да модуль биргәннәр (андагы бәяләр шактый кыйммәт). Баксаң, “Татар иле”н рекламалауга быел тагын 3 млн сум бирелгән икән. Бу турыда “Бизнес-Онлайн” язды. Реклама акциясе шактый уңышлы бара. Әйтик, ноябрьдә “Татар иле”нә тәүлегенә 331 кеше генә кергән булса, декабрьдә инде тәүлегенә 361 кеше керә (liveinternet статистикасы)!

Инде грантка кире кайтып. Бәйгенең приказы буенча, җиңүчеләр билгеле булгач та, 10 көн дәвамында аларның исемлеге сайтка эленергә тиеш. Инде әллә никадәр вакыт узды, ә ул исемлек һаман юк. Җиңүчеләр инде күптән килешүләр имзалап йөри, ә җиңелүчеләр көн саен сайтка кереп, берәр мәгълүмат юк микән дип изаланырга мәҗбүр. Менә шундый мөнәсәбәт. Хәер, берәр кайчан килеп чыгар инде ул исемлек. Килеп чыккач, узган елгы һәм быелгы җиңүчеләрне юри генә чагыштырып карагыз әле, бер үк исемнәр күрерсез.

Инде киләсе елга да әлеге бәйгедә катнашырга теләүчеләр булса, сезгә бер киңәш бирә алам. 100% уза торган бер Интернет-проект бар! Бәйгенең сайтын татарчага тәрҗемә итеп бирегез әле. Алайса, грант турындагы бүлекләре дә, башка мөһим бүлекләре дә татар телле версияләрендә буп-буш! Үз итекләре булмый торып, башкаларга итек өләшеп утыру килешми ))

Данил СӘФӘРОВ
Матбугат.ру
№ --- | 28.12.2015