МУБАЙ БЕЛӘН "БАРБЕКЮ" НИК КИЛМӘГӘН?

"Үзебез" яңа буын яшьләр хәрәкәте оештырган "Мин татарча сөйләшәм" акциясе дәвам итә. 20 апрель көнне маңкортларны "татарчалаштыру" чаралары Казанның иң зур сәүдә үзәге - "МЕГА"да узды.

Кибет буенча яшь волонтер егет һәм кызлар татарча сөйләшергә өндәүче листовкалар, түштамгалар, 150 сүздән торган русча-татарча сүзлекләр өләшеп йөрделәр. Балык ыслау өчен опилка юк микән дип "OBI"га да барып килдем, аннары "МЕГА"ның бөтенләй башка ягындагы "Икеа"га да сугылдым. Тегендә дә, монда да "Үзебез"некеләр бар иде. Күп кенә бутик һәм кибетләрнең тәрәзә пыяласында "Мин татарча сөйләшәм" дигән стикерлар күрдем. Боларны "МЕГА"лылар үзләре ябыштырган икән. Ә кибетчеләрдә - түштамгалар. Андый кибетчеләргә курыйкмыйча килеп татарча эндәшергә була. Гомумән, акцияне үткәрүдә бу сәүдә үзәге аренда урынын гына биреп калмаган, ә үзе дә зур матди ярдәм күрсәткән. Стикерлар, түштамгалар, сүзлекләр "МЕГА" акчасына эшләнгән, алып баручыларга һәм җырчыларга да гонорарны кибет түләгән. Рәхмәт аларга. Алып баручылар дигәннән - ул Илфар Кәримов белән Айсылу Лерон иде. Ә җырларны Резеда исемле яшь кыз һәм "Иттифакъ" төркеме тәкъдим итте. Моннан тыш чарада Илнур Фәйзрахманов, Гөлназ Фәйзрахманова, Мәдинә Нурулла, Рузил Мөхетдинов, Сәүбән Закир кебек танылган шәхесләр бар иде. Концерт һәм конкурс-уеннар "МЕГА"дагы шугалак янындагы сәхнә тирәсендә оештырылды.

Бар да ал да гөл диясе килгән иде дә, тик булмый шул. Акциянең ахырында "Үзебез" хәрәкәтенең координаторы Алия Сабирова очрады. Кәефе төшкән. Баксаң, чарага килергә вәгъдә итеп тә килмәгән кешеләр бар икән - Мубай һәм "Барбекю" төркеме. Өч бала анасы Алия чабып йөри - ә болар... Шуңа күрә концерт иртәрәк тәмамланды. Хәер, аларның килмәүләре - "чипуха"...

P.S. 26 апрель көнне 15.00 сәгатьтә Бауман урамында "Мин татарча сйләшәм" акциясенең кульминацион чаралары. Килмәгәннәр үзләренә үпкәләсен! :)