|
|
Бүген кемнәр туган
|
|
Архив
|
22.12.2015 Җәмгыять
"Магнит" бәяләре буенча санасаң, Яңа ел табыны ничә сумга төшә?«Яңа елны менә шулай да үткәреп була», дип язган да, бер танышым өендә булган бар нигъмәтен фотога төшереп, социаль челтәрдә элгән. Үзе тозлаган кыяр, гөмбә, кәбестә, кайнатма, компот, өйдә пешергән торт. Кибеттән ипи белән сельдь балыгы гына сатып алдым дигән. Аның каравы, бәйрәм чыгымлы булмаган. Әлбәттә, һәркем юрганына карап аягын суза. Тәҗрибә күрсәткәнчә, күпләрнең Яңа елны кәбестә, компот белән генә каршы аласы килми шул. Бурычка алып торып булса да, мул табын әзерлиләр. Бәйрәмнән соң да ике көнгә җитәрлек итеп. «ШК» журналисты Яңа ел табыны уртача ничә сумга төшәчәген исәпләп карады.
Интернетны ачсаң, ризык рецептларының күплегеннән баш әйләнә. Бәйрәм табынына да инде күптән тун астындагы сельдь белән винегрет кына куймыйлар. Шулай да элек-электән килгән, Яңа ел табынында алыштыргысыз «Оливье» салаты (аны халык телендә «кышкы салат» дип тә йөртәләр) популярлыгын югалтмый.
Әлеге салатның рецепты һәр хуҗабикәгә таныш. Салат өчен кирәкле ингредиентларның бәяләрен барлыйм. Безнең яндагы «Магнит» кибетендә бәрәңгенең килосы 11 сум тора. Росстат мәгълүматларына караганда, былтыргы белән чагыштырганда, ул шактыйга очсызланган. Ә менә кишер, киресенчә, 4 сумга күтәрелгән. Бүген кибеттә кишернең килосын 20 сумга да алырга була. Тозлаган кыярның 720 миллилитрлы банкасы 132 сум икәнен күргәч, ярый әле авылда яшелчәләрне бакчада үзебез үстерәбез дип уйлап куйдым. Кыскасы, без әзерләгән «кышкы» салат 218 сумга төште. Һәр ингредиентны якынча 300әр граммнан куштык.
Яңа ел табынының тагын мөһим атрибутлары – мандарин һәм пилмән. Гадәттә, Яңа ел алдыннан гаилә белән җыелышып пилмән бөгү үзе бер бәйрәм. Шуңа да пилмәннең сатудагысын карап та тормадым. Төркиядән мандариннар кайтарылмый башласа да, шөкер, бу җиләк-җимешсез торган юк. Кибет тулы хуш исле мандарин, бәяләре дә түзәрлек. Килосы 97-140 сум тирәсе. Кайбер сәүдә үзәкләреннән акция белән 67 сумга да табарга була. Киләсе ел маймыл елы булгач, табында банансыз да булмас, мөгаен. Эчемлеккә килгәндә, Татарстан сәламәтлек саклау министры Адел Вафинның әнисе Альмира ханым: «Бәйрәм табынына беркайчан да кибет согы куйганыбыз юк. Иң файдалысы – үзең ясаган компот», – дигән иде. «Компот бетсә, кибеттән катырылган җимеш сатып алып кайнатсаң яхшы», – дип киңәш биргәне истә. Катырылган чия белән җиләкнең 300 граммы 67 сум дип исәпләсәң, файдалы согың шактый арзанга төшә.
Бәйрәмгә каз, тавык пешерүчеләр дә бар. Бүген авылларда каз 1500 сум тирәсе торса, тавыкны, зурлыгына карап – 250-300 сумга да алырга була.
Бәйрәм табыны
Ипи – 24 сум
Мандарин – 67 сум (килосы)
Алма – 71 сум (килосы)
Банан – 42 сум (килосы)
Сельдь балыгы – 1 балык 67 сум
(килосы 197 сум)
Компот – 67 сум
Пилмән өчен ит – 280 сум (килосы)
Тавык – 280 сум (берсе)
Торт – 300 сум
«Оливье» салаты – 218 сум
Барлыгы – 1416 сум
«Магнит» кибетендәге бәяләргә нигезләнеп әзерләнде.
Эльвира МОЗАФФАР |
Иң күп укылган
|