Сез кайсы як мишәре? (ФОТО)

Кәефләр шәп. Әйтерсең, моңарчы бер-берсенә кунакка йөрешкән дуслар-туганнар җыелышкан. Таныш булмаганнары да аптырап тормый. Һәр тарафта: “Сез кайсы як мишәре?” – дигән сорау яңгырап тора. Ишеттегезме-белдегезме икән: бу – УНИКС залы, монда тамашачылар хозурына “Мишәрләрем” дип аталган концерт-тамаша тәкъдим ителде.

Сүз дә юк, концерт шәп булды. Хәер, моңа гаҗәпләнергә дә кирәкмидер. “Мишәрләрем” проектының авторы һәм продюсеры – Рифат Әхмәт улы Фәттахов. Шуңа да Рәнис Габбасов, Азат Абитов, Сиринә Зәйнетдинова кебек Ваһапов исемендәге фестивальдә җиңү яулаган асыл кызлар-егетләрнең бу тамашада сәхнә тотуы гадәти хәл булып тоелды. Талантлы яшьләр янында Илсаф, Халидә Бигичева кебек күренекле җырчыларның чыгышы концертны чын мәгънәсендә сәнгать әсәренә әверелдерде. Илсөя Бәдретдинова, Нияз Җәләлов, Рәшит Шамкаевлар үзләренә генә хас төсмерләр өстәде. Мәскәүдән кайткан җырчылар Гүзәлия белән Эмиль әфәнде нур өстенә нур булды. Аңлагансыздыр инде, бу концертта катнашучыларның барысы да – җырчылар да, музыкантлар да, алып баручылар – әтисе ягыннан тамырлары Чуашстанның Батыр районыннан булган Гөлназ Сәфәрова белән Камал театрыннан халык артисты Искәндәр Хәйруллин да – мишәрләр кавеменнән. Залда да гел мишәрләр диярлек булмадымы икән әле? Чөнки алып баручылар сәхнәдән Чүпрәле, Чирмешән, Аксубай, Чуашстан, Нижгар һәм төрле төбәк мишәрләре хакында сорашканда: “Без монда-а-а”, – дигән тавышлары шактый саллы ишетелде.

Әйтергә кирәк, тамашачыларның төрле төбәкләрдән җыелганына да гаҗәпләнергә түгел, сокланырга гына кала. Моның үз сере бар. Күбесе үз якташлары өчен җан атарга килгән. Мәсәлән, Чуашстанның Азат Абитов туып үскән Шыгырдан авылыннан биш рәт тутырып утырдылар. Бу да – рекламалауның бер төре бит. Реклама җәһәтеннән, мөгаен, “Мишәрләрем” тамашасын оештыручыларны үрнәк итеп куярга кирәктер. Өр-яңа проектның беренче концерты һәм шундый зур уңыш! Интернет челтәрендә дә оештыручылар афиша элү белән генә чикләнмәделәр, һәрбер катнашучы хакында тәфсилләп сөйләделәр, иҗаты белән таныштырдылар. Бер караганда, инде барысын да беләсең, интернетта җырларын тыңларга да мөмкинлек бар, концертка барып тормасаң да була кебек. Юк, игъланнар шулай итеп оештырылган ки, барыбер кызыктыра, ымсындыра, барасы, карыйсы килү теләген уята. Һәм юкка түгел. Гөлназ Сәфәрова сценарийны тамашачыны җәлеп итәрлек итеп төзегән. Сәхнәгә менгән һәр кешенең чын йөзен ачып бирә алды ул. Мәсәлән, Самара егете, музыкант Ринат Вәлиевнең сигез баласы барлыгын ишеткәч, белмәгәннәр аһ итте. Буа җырчылары Динә белән Рафаэль Латыйповлар инде утыз елдан артык тату гына яшәп һәм эшләп яталар икән. Аларны мишәрләр арасында үрнәк гаилә буларак тәкъдим иттеләр. Концертта Рәшит Ваһапов, Хәйдәр Бигичев, Габдулла Рәхимкулов кебек кавемдәшләрен дә искә алырга онытмадылар. Рафаэль Ильясов, Мирсәет Сөнгатуллин, Искәндәр Биктаһировларны да “үзләренеке” иттеләр.