“Солтан” агрофирмасы: Уңдырышлылыкны арттырасың килсә... сугар (ФОТО, ВИДЕО)

Мәсәлән, Балык Бистәсе районындагы “Солтан” агрофирмасы җитәкчеләре әнә шундыйлардан. Якынча җиде ел элек, “Солтан” колхозы тулысынча таркалгач, дүрт дус-иш бергә киңәшләшәләр дә, биредә агрофирма оештырып җибәрәләр. Беренчел капитал әллә ни зур булмый. Техника сатып алып, эшкә керешү өчен 70 миллион сум күләмендә инвестицион кредит алырга туры килә. Шул рәвешле, беренче елны 1200 гектар мәйданны гына эшкәртү мөмкинлеге туа. Еллар узган саен, чәчүлек мәйданнары да зурая, хуҗалыкның рентабельлеге дә артканнан-арта. Агрофирма директоры Ринат Хамадияров сүзләренчә, хуҗалык китергән керемне алар һаман да үсү һәм камилләшүгә тоталар әле...

 

 

Әлеге хуҗалык бары тик игенчелек белән генә шөгыльләнә. Нигездә яшелчә җитештерәләр. Бәрәңге, кызыл чөгендер, кәбестә һәм көнбагыш аеруча керемле культуралардан санала.

 

- Инвестицион кредитны киләсе елның маенда түләп бетерергә планлаштырабыз. Аннары банклар янына якын килмәскә инде. Үз чараларыбызга гына эшләргә телибез, - ди Ринат әфәнде.

 

 

Биредә бәрәңге культурасына аеруча зур игътибар бирелә. Узган ел хуҗалыкта бәрәңгене 100 гектарда гына утыртсалар, быел әлеге культура мәйданнары 200 гектарга җиткән. Бактың исә, агымдагы елда биредә беренче тапкыр заманча сугару системасыннан файдалана башлаганнар икән.

 

 

- Әлеге системаны сатып алу һәм урнаштыру 5 миллион сумга төште. Әлбәттә, без аны дәүләт ярдәме белән гамәлгә куйдык: чыгымнарның 80 процентын дәүләттән алган субсидияләр каплады. Бу якынча 3,7 миллион сум дигән сүз. Татарстанның авыл хуҗалыгы һәм азык-төлек министрлыгы һәм “Татмелиорация” компаниясенә зур рәхмәт, - дип белдерде Ринат Хамадияров.

 

Әлеге мелиорация системасы тамчылап сугаруны күздә тота. Махсус җиһаз ярдәмендә су үсемлекнең тамырына җибәрелә. Шул рәвешле, суның дымга әверелү яки агып чыгу мөмкинлеге юкка чыга. Бу, үз чиратында, суны саклап тотарга ярдәм итә.

 

 

- Беренче карашка, үсемлекнең төбе коп-коры кебек. Ә чынлыкта исә аның тамыры дым белән тулысынча тәэмин ителә. Шунысы мөһим: бу җиһаз ярдәмендә культураларны өстәмә витаминнар белән тәэмин итү һәм корткычларга каршы көрәшү мөмкинлеге дә туды, - дип аңлатты җитәкче.

 

 

Хәзерге вакытта әлеге заманча сугару системасы 100 гектар бәрәңге җирендә кулланыла. Калган 100 гектар мәйданда мелиорациянең гади ысулыннан файдаланалар.

 

 

Әйтергә кирәк, тамчылап сугаруның төп өстенлеге – ул хуҗалыкка уңдырышлылыкны бермә-бер арттырырга ярдәм иткән. Гадәттә, бер гектар җирдән 250-330 центнер бәрәңге җыйсалар, быел бу күрсәткеч 450 центнерга кадәр (!) җиткән. Нәтиҗәдә, рентабельлекне якынча 20 процентка арттырганнар.

 

Кызганыч, агымдагы елда бәрәңгегә ихтыяҗ башка еллар белән чагыштырганда бераз кимегән икән. Аның каравы, борчылырга урын юк, диләр биредә. Ник дигәндә, бәрәңге саклау өчен махсус биналары бар. Бу исә хуҗалыкка әлеге культураны кыш көннәрендә дә рәхәтләнеп сату мөмкинлеге бирә.

 

 

- Бәрәңгегә ихтыяҗ көн саен үзгәреп тора бит. Мәсәлән, хәзерге вакытта килограммын 10 сумга сатабыз, - дип ассызыклады Ринат әфәнде.

 

Уртача хезмәт хакы – 20 мең сум

 

Бәрәңгедән кала, хуҗалыкта кызыл чөгендер, кәбестә, көнбагыш һ.б. культуралар да җитештерелә. Быел кызыл чөгендер 400 тонна күләмендә уңыш биргән. Җыеп алынган кәбестә күләме 1600 тонна тәшкил иткән. Аларның барысы да сатылып беткән инде.

 

 

- Яшелчәне сатуга килгәндә, аларны бөтен Россиягә таратабыз. Көнбагыш үстерү дә шактый гына яхшы уңыш китерә, - дип белдерде Ринат Хамадияров.

 

Хәзерге вакытта агрофирмада даими эшләүчеләр саны 30. Җәй көннәрендә аларның саны 50гә җитә. Араларында күрше авыллардан килеп эшләүчеләр дә бар икән.

 

- Хезмәт хакларына килгәндә, хәзерге вакытта биредә уртача хезмәт хакы 20 мең сум, - дип дәвам итте сүзен җитәкче.