22.10.2015 Матбугат

Гөлнара Җәлилова икенче тапкыр әни булды (ФОТО)

“Чын-чынлап хатын-кыз булып икенче баладан соң гына формалашасың икән! Мин моны икенче кызымны алып кайткач кына аңладым. Ниһаять, үзеңне олы кеше итеп хис итәсең, моңарчы олы кызым Мәрьям сеңлем кебек кенә булган”, - ди шагыйрә һәм журналист Гөлнара Җәлилова.

Икенче кызлары 09.09.2015 дигән матур датада Казанның перинаталь үзәгендә дөньяга килгән. 2950 гр. һәм 49 см булып туган кызга исемне дә матурны сайлаганнар - Әминә.

“Әминә ике тамчы су кебек апасына, ә апасы әтисенә охшаган, - ди Гөлнара, - әмма холкы миңа тартачак ахры - тавышы каты (көлә). Мәрьямнең соңгы өч елда кыш бабайдан сораган бүләге сеңел иде, аны бәхет күмеп китте. Әмма бу әти бүлешү мәсьәләсенә һич кагылмый - әгәр әти 15 минут Әминәне күтәреп йөри икән, шул ук кадәр аны да күтәреп йөртергә тиеш, һәр “пәп” итүдән дә аңа өлеш шул кадәр үк”.

Олы баланы күбрәк, кечкенәне кечерәк яраталар дигән сүз бар. Гөлнара да моны истә тота. Шуңа да олы кызлары әллә ни борчылмый ди. Игьтибар азрак тәти башласа, монда мин дә - олы тәмлүшкә дә бар, дип өстәргә дә мөмкин икән.

“Ә мин Аллаһка мең шөкер укып, икенче кат шушындый зур бәхет татырга насыйп иткәне өчен Әлһәмдүллиләһ дип, эйфория халәтендә яшим. Сез эшкә ашыгасыз, каударланасыз, ә мин рәхәтләнеп мес-мес килгән бәбием белән урамда саф һава сулап йөрим... Аллага шөкер!” – ди Гөлнара.

Ишле гаиләне чын күңелдән котлыйбыз. Алга таба да шулай бәхетле яшәгез!