|
|
Бүген кемнәр туган
|
|
Архив
|
24.09.2015 Җәмгыять
“Такырбаш”лар кая киткән?Яшь әти-әниләрнең мәшәкатьләре артты. Бүген кечкенә балаларны чәчтарашханәгә алып бару модага әйләнде. Башкалада гына да нәниләргә хезмәт күрсәтүче дистәдән артык махсус үзәк бар. Биредә гади генә осталар түгел, ә чәчтараш-психологлар эшли. Ир баланың чәчен кәттә итеп кистерү уртача 700-800 сумга төшә. Ә кыз тәрбияләүче әти-әниләргә тагын да кыйммәтрәк түләргә туры киләчәк. Шунысы да бар: балалар чәчтарашханәсенә бер атна-ун көн алдан язылырга кирәк.
Баланың чәчен өйдә генә кистерүчеләр кими
Башкаладагы паркларның берсенә баргач, кызыклы сөйләшү шаһиты булырга туры килде. Урта яшьтәге шәһәр әбисе оныгы белән үзе йөри торган уенчык машина тирәсендә мәш килә. Сабый “тимер ат”ка бер утыра, бер төшә. Әби аны күзәтеп торып арыды, ахрысы – янәшәдәге эскәмиягә барып “кунаклады”. Озак та үтмәде, бала машинадан җиргә егылып төште. Урындыкта утырган әбисе килеп җиткәнче, сабыйны узып баручы хатын-кыз күтәреп алды. “Кызыгыз бик шук икән”, – дип сүз башлады ул. Тик шунда ук: “Кыз түгел ул, малай”, – дигән җавап ишетте. Чәче колагыннан узган бала, чыннан да, кызга охшаган иде үзе. Таныш түгел хатын гафу үтенде. Әби исә сүзен дәвам итеп: “Бер ай ярымнан бирле, баланың чәчен кистерергә дип, бик зәвыклы гаилә чәчтарашханәсендә чират җиткәнен көтәбез, бу көннәрдә шалтыратырга тиешләр инде”, – диде. Мода артыннан куып, өлкәннәр сабыйның чәче тәмам үсеп беткәнен дә сизми калган, ахры. Баланың чәчен кисәргә тәкъдим итүчеләр төрлечә кызыктырып карый.
Казандагы шундый салоннарның берсенә шалтыраттык. Бактың исә, баланың чәчен аның йөз-битенә туры китереп кисәргә кирәк икән. Мәсәлән, түгәрәк һәм озынча битле сабыйларның башын төрлечә рәтлиләр. Әти-әниләргә баланың чәчен тәртиптә тоту өчен төрле косметик кремнар да тәкъдим итәләр. Монысы да – үзенчәлекле киңәш. Чәч кистерергә яңа туган баланы да алып килергә мөмкин. Әлеге хезмәт 350 сумнан башлана. Тәүге чәчне авыл мунчасында гына кырып атудан баш тартучыларга бу йоладан бәйрәм ясарга да вәгъдә итәләр. Оператор эш барышын видеога төшерәчәк. Ә чәчне бизәкле конвертка салып бирәчәкләр. Чәчне такыр итеп алдыру 250 сум тора. Тик, әйтүләренә караганда, бүген мондый хезмәттән файдаланучы юк икән.
Бер яше тулмаган баланы чәчтарашханәгә алып бару очсызрак. Бәяләр 300-350 сум тирәсе. Ә менә бер яшьтән зуррак малайларга гади итеп чәч кистерү 450 сумнан башлана. “Заманча” алдыру 490-500 сум тора. Сабыйның башында чәчен кырып, “яшен” сурәтләргә теләсәң, тагын 50-100 сум түлисе. Төрле рәсемнәр төшерү – 200 сум тирәсе. Кызлар чәчен кистерү 100 сумга кыйммәтрәк бәяләнә. Озын чәчне үрергә өйрәтергә дә тәкъдим итәләр чәчтарашханәдә. Акчаң гына җитсен! Кайбер салоннарда махсус курслар оештырганнар. Дүрт дәрес бер мең сум тора. Малайларны – айга бер, кызларны исә ике айга бер тапкыр чәчтарашханәгә алып килергә киңәш иттеләр. Чират бер атна алдан төзелә.
Чәчтарашханәдә бер баланың башын рәткә китерү өчен якынча бер сәгать вакыт бүлеп бирелә. Көйсез сабыйларны башта махсус уен мәйданчыгына чакыралар. Бу – чәчтарашка ияләшү өчен эшләнә. Ә чәч кисү өчен гади урындыкка түгел, ә төрле көйләр уйнап торган машина йә булмаса мотоциклга утырталар. Кызларга алсу яки кызыл төстәгесен тәкъдим итәләр. Бала каршында зур телевизор тора. Диварларда да мультфильм каһарманнары сурәтләнгән. Бала онытылып китеп утырсын гына! Кайбер салоннарда истәлеккә фото да бүләк итәләр. Бишенче тапкыр чәч кистерү бушлай дип кызыктыручылар да бар. Башкалада өч яшьлек ир баланың чәчен кистерү иң кыйммәте ике мең сумга төшәргә мөмкин. Чәчтарашханәгә сабый белән тәүге сәфәр кәефне кырмасын өчен нишләргә?
Алисә ЗАКАМСКАЯ, психолог:
– Баланың чәчен өйдә алда утырткан килеш кистергән очракта да, ул еш кына тик утырмый, кыбырсына. Ә чәчтарашханәдә кайчы, чәч алу машинасы гомумән чит кеше кулында. Шуңа күрә бала куркырга да мөмкин. Чәчтарашханәгә барганчы ук, сабыйга кая барачагыгызны, анда кемнәр эшләвен аңлатырга тырышыгыз. Янәшәдәге гади салонга барганчы, балалар өчен махсус хезмәт күрсәтүче урынга бару әйбәтрәк. Чөнки биредә психологик басым азрак. Баланы көзге каршына утыртмагыз. Ул барыбер үзен күзәтеп утырмаячак. Ә менә баш очындагы кайчы куркытырга да ихтимал. Бала үзен тыныч тотсын өчен, аның кулына яраткан уенчыгын тоттырыгыз. Өч яшькә кадәрге баланы, гомумән, чәчтарашханәгә алып бармасагыз яхшырак.
Эльвира ВӘЛИЕВА |
Иң күп укылган
|