Чәчәкләр тотып кулга, без чыктык олы юлга...

Бүген мәктәпләрдә Белем көне гөрләп үтте. Быел Татарстанда 43 мең 364 бала беренче сыйныфка укырга керде. Шуларның 13 меңнән артыгы Казан мәктәпләренә туры килә.

Бу уку елында җиде яңа мәктәп ишекләрен ачты. Яңа Савин районында ачылганы – республикадагы иң зур мәктәп. Аерым фәннәрне тирәнтен өйрәнүгә юнәлтелгән 179нчы мәктәптә 1375 бала белем алачак. Быел биредә сигез беренче сыйныф. Белем көне тантанасында катнашкан Рөстәм Миңнеханов мәктәп укучысы белән беренче кыңгырау да чыңлатты. “Һәр ата-ана өчен баласының белемле булуы иң мөһиме”, – дип ассызыклады ул. Белем көнендә Рөстәм Миңнеханов Россиянең беренче шәһәре – 21 гасырда төзелгән Иннополиста балалар бакчасын да ачты.

Татарстан лидеры:

– Республикабыз мәгариф өлкәсендә Россия Федерациясе буенча алдынгылардан санала, – ди. – Сыналасыбыз бар әле: киләсе елда Россиядә беренче тапкыр үзебездә мәктәп укучыларының информатика буенча халыкара олимпиадасы үтәчәк, 2019 елда Казанда WorldSkills һөнәри осталык халыкара чемпионатын уздырасыбыз бар. Иң мөһиме, сынатмаска! – диде.

Белем көне уңаеннан Татарстанның Премьер-министры урынбасары,Татарстан Мәгариф һәм фән министры Энгель Фәттахов та балаларга бәйрәм котлавы юллады:

– Хөрмәтле балалар, кайсы мәктәптә – авыл яки шәһәр мәктәбендә укуыгызга карамастан, сез талантыгыз һәм сәләтегезгә тәңгәл сыйфатлы белем алсын өчен без барысын да эшләргә тырышабыз. Безнең өчен сезнең яхшы белемгә ия булуыгыз гына түгел, анализлый, кыю идеяләр бирә, югары максатлар куеп, аларга ирешә белүегез мөһим. Яхшы нәтиҗәләргә ирешер өчен сездә көч, ихтыяр, үҗәтлек һәм хезмәт сөючәнлек кебек сыйфатлар җитәр дип ышанам. Ата-аналарга балаларга күбрәк вакыт бирсеннәр, аларга терәк булсыннар, ярдәм итсеннәр, казанышларына куансыннар, ныклы һәм бәхетле гаилә булсыннар, дип телисе килә.

Зур кызыксыну белән мәктәп бусагасына беренче тапкыр аяк баскан укучыларга: мәктәп еллары онытылмас мизгелләр булып саклансын, белем иле мавыктыргыч булса иде, дигән теләктә калабыз...