Социаль челтәрләрдә утыручылар белән ничек көрәшәләр?

Россия ширкәтләрендә язылган һәм язылмаган кагыйдәләр җитәрлек. Бүгенге көндә шуларның иң әһәмиятлесе – социаль челтәрләрдә утыруга караганнары. Күн кенә компанияләрдә социаль челтәрләрдә утырганда нәрсә эшләргә яраган-ярамаганлыгын искәртә торган кагыйдәләр бар.

Хезмәткәрләрнең интернеттагы чамадан тыш активлыгын тыюның нинди ысуллары бар? Super.job тикшеренүләр порталы шуны ачыклаган.

Эш белән тәэмин итүчеләрнең 51 проценты социаль челтәрләр белән артык мавыгучыларга каршы көрәшә. Ширкәтләрнең 29 проценты эш компьютерларынан социаль челтәрләргә керүне тыя (“блокировка” куя).

Ләкин моңа да карамастан, эшчеләр бу тыюларны чикләп уза. Эш компьютерыннан кереп булмаса да, хезмәткәрләр телефон яки анонимайзер аша утыра. Россиянең һәр дүртенче ширкәте социаль челтәрләрдә коммерция серен саклауны, конфиденциаль мәгълүматны читкә чыгармауны үтенә. Эш бирүчеләрнең 18 проценты үз персоналының мораль-әхлак ягын да кайгырта: хезмәткәрләрнең язган фикерләренең дөрес язылышын, цензурага сыймаган сүзләрнең, ялангач төшкән фотоларның булу-булмавын тикшерә. Эш белән тәэмин итүчеләрнең 16 проценты оешма турында тискәре комментарийлар язуны тыя. Ә кайбер оешмалар хәтта үзләре турында уңай фикер язуны да чикли икән.

Хәер, социаль челтәрләрдәге чамадан тыш активлык кайвакыт аяныч нәтиҗәләргә дә китерергә мөмкин. Әйткән сүз – аткан ук, дип халык белми әйтми. Башкалар белән чагыштырганда, интернеттагы активлыклары аркасында шелтәләрне күбрәк 24 яшькә кадәрле ир-атлар ала икән.

Кече эшмәкәрлек белән чагыштырганда, эре бизнеста социаль челтәрләргә керүне ешрак тыялар. Сораштыру күрсәткәнчә, беренчеләре исә нигездә бу өлкәдә нинди дә булса кагыйдәләр кертми.