Замирә Рәҗәпова сөйгәне Максим белән никах укытты

14 июль көнне Замирә Рәҗәпова 5 ел буе йөргән сөйгән егете белән Казанда никах укыткан. Анысы да очраклы килеп чыккан.

– Ел саен ифтар ашы уздыра торган матур гадәтебез бар. Быел шуңа әзерләнеп йөргәндә, никах укыту теләге туды. Телевидениеда эшләүче остазым Наилә Сабитова киңәше белән Госман хәзрәткә шалтыраттык. Бәхетебезгә, хәзрәтнең бер генә көне буш булып чыкты һәм ул көнгә никахны билгеләдек, – дип сөйләде Замирә.

Бәхетле пар никахны өйдә иң якын кешеләре белән үткәргән. Алар арасында танылган артистлар Зөлфия һәм Җәвит Шакировлар, Алсу һәм Азат Фазлыевлар һәм башка туганнары, дуслары булган. Кияү - Казаннан, Максим исемле татар егете. Һөнәре буенча музыкант. Замирә аның белән җырчы Филүс Каһировның төркемендә эшләгәндә танышкан. "Аллага шөкер, Максим улым Аяз белән дә бик дус. Ул аны хоккейга да йөртә. Тату булганнарына сөенәм", – ди ул. Замирә туй булмый, язылышып кына алабыз, безнең өчен никах уздыру мөһимрәк, диде.

Замирә Рәҗәпованың киңкырлы талант иясе булуын күпләр белә. Ул ТР Халыклар дуслыгы йортында режиссер булып эшли. Моннан тыш, күңелле итеп мәҗлесләр алып бара һәм артистларга клиплар төшерә. Соңгысы белән әле күптән түгел генә шөгыльләнә башлаган. "Мин берәр җырны тыңлаган саен күз алдыма аның сюжеты килеп баса иде. Бу эш миңа бик ошый. Режиссеры да, сценарий авторы да үзем", – диде ул.