Балалар бакчалары ишеге кемнәр өчен ачылыр?

1 июньдә Татарстан балалар бакчаларына нәниләрне туплау башланды. Дистә меңнән артык нарасый юллама алу бәхетенә иреште инде. Әмма “Электрон балалар бакчасы” системасында бакчага кабул ителү турында сөенечле мәгълүмат күрмәгәннәргә борчылырга кирәкми – төркемнәр август ахырына кадәр җыелачак.

Татарстан соңгы елларда бэби-бум кичерә. Шул рәвешле айлап түгел, көнләп үсүче нәниләрне балалар бакчалары белән тәэмин итү иң әһәмиятле мәсьәләләрнең берсенә әверелде. Бала табу йортында ук сабыйларын бакчага чиратка куйган яшь әти-әниләр нарасыйларына тәрбия учагында урын бирүне зур түземсезлек белән көтә. Әмма республикабызда балалар бакчалары төзү буенча төрле программалар гамәлгә ашырылып, елына дистәләгән тәрбия учаклары калкып чыкса да, әлегә төзелеш темплары демографик үсешкә җитешми.

Мәгълүм булганча, балалар бакчаларында төркемнәр җыю, нигездә, җәй айларында башкарыла. Тәрбия йортына кабул итү инде менә берничә ел тулысынча электрон рәвешкә күчсә дә, район мәгариф идарәләре бу чорда әти-әниләр белән шыгрым тулы. Алар интернет ресурска гына ышанып калмыйча, иң дөрес мәгълүматны белгечләрдән белешергә омтыла.

Әмма кызганычка, моңа карап кына чират тизрәк бармый. Ташламалы категорияләрдән кала, барлык балалар да бер шартларга куелган. Дөрес, соңгы елларда өч яшьлекләрне урнаштыруга өстенлекләр бирелә башлады. Шул рәвешле бу категория тулысынча диярлек тәрбия йортларында урыннар белән тәэмин ителде. Ләкин 1,5-3 яшьлекләр арасында чират көтүчеләр бик күп. Зур шәһәрләрдә, барыннан да бигрәк башкалабыз Казанда, вәзгыять шактый кискен.

Әмма республика җитәкчелеге бу мәсьәләне хәл итүгә зур көч куя. 2010 елда барлыкка килгән “Сәламәтлек бишьеллыгы” программасын тормышка ашырган чорда Казанда 101 балалар бакчасы төзелде.

- Бүгенге көндә “Бәләкәч” республика программасы, “Юл картасы” федераль программасы ярдәмендә балалар өчен мәктәпкәчә белем бирү учреждениеләрен төзү, шәхси балалар бакчалары, капиталь ремонт, өстәмә төркемнәр булдыру ярдәмендә Казан 5 ел эчендә быел үз ишекләрен ачарга әзерләнгән 20 тәрбия учагын исәпкә алсак, 101 балалар бакчасына баеды. Без программа буенча бирелгән вәгъдәне 5 тапкырга арттырып үтәдек, - ди Казан мэры Илсур Метшин.

Моңа да карамастан, Казан мэриясенең интернет аша кабул итү бүлегенә “Чиратны алга күчерергә ярдәм итегез...”, “Фәлән урында кайчан балалар бакчасы төзеләчәк” һәм башка шундый сораулар белән мөрәҗәгатьләр килә тора.

“Казанда бәби-бум дәвам итә, һәм без әти-әниләр үзләренә куйган темпларга яраклашырга тырышачакбыз. Балалар тапсыннар – без тагы төзәячәкбез”, - дип тынычландыра шәһәр башлыгы.