«Халык инспекторы»: йөртүчеләр - җәяүлеләрне, җәяүлеләр - йөртүчеләрне «сата»

Хәтерләсәгез, “Халык инспекторы” проекты Татарстанда узган елның ноябрь аенда эшли башлаган иде. Ул халыкка шәһәр юлларында тәртипне тәэмин итү эшендә шәхсән катнашу хокукы бирде. Шул ук вакытта әлеге проект казанлыларда юл йөрү кагыйдәләрен бозучыларга начар тискәре караш барлыкка китерер, дип фаразланды.

 

- 2015 елның икенче кварталында “Халык инспекторы” системасына барлыгы 13 008 гариза килде. Бу агымдагы елның беренче өч ае белән чагыштырганда ике тапкырга артыграк. Ул чорда без халыктан нибары 5 150 мөрәҗәгать кенә алган идек, - диделәр Татарстанның Мәгълүматлаштыру һәм элемтә министрлыгында.

 

Белгечләр әлеге вәзгыятьне яз һәм җәй айларында паркинглар белән бәйле проблеманың аеруча кискенләшүе белән аңлата. Гаризаларның күбесе нәкъ менә машина кую урыннары белән бәйле икән.

 

- Агымдагы елның икенче кварталында барлыгы 13 235 эш буенча тиешле карар чыгарылды. Тиздән тагын 5 863 мөрәҗәгать буенча эш тәмамланырга тиеш, - ди белгечләр.

 

Хәер, бу өлкәдә берникадәр авырлыклар да юк түгел. Бактың исә, машина йөртүчеләр хокук сакчыларына бер-берләренең юл йөрү кагыйдәләрен бозулары турында хәбәр итәргә ашыкмый икән. “Халык инспекторы” системасы, нигездә, машина йөртүчеләр һәм җәяүлеләр арасындагы бәхәсләрне хәл итү чарасына әверелгән. Мәсәлән, башкалада җәяүле юллары аша чыгучы кешеләрне бәрдерү белән бәйле проблема аеруча актуаль. “Халык инспекторы” аша килеп ирешкән шикаятьләр арасында андыйлар аеруча еш очрый икән.

 

Тагын бер кат исегезгә төшерәбез: «Халык инспекторы” проектында катнашу өчен телефонга махсус кушымта урнаштырып, шуның аша юл йөрү кагыйдәләрен бозу очрагы күрсәтелгән видео урнаштыру да җитә. Иң мөһиме, видеода машинаның номеры, юл билгеләре һәм җәяүлеләр аермачык күренергә тиеш.