Әйтә торалар – бата торалар

Республика сулыкларында көн саен диярлек өч кеше батып үлә. Җәйге челлә көтмәгәндә килеп чыккан көчле давыллары белән генә түгел, су корбаннары белән дә куркыныч. Ел башыннан бирле республика сулык­ларында 55 кешенең гомере өзелгән. Шуларның 4се – балалар.

“Бу юнәлештә профилактик эш алып барылса да, нәтиҗәгә ирешеп булмый әле. Һава температурасы күтәрелү белән батып үлү­челәр саны да арта. Шуның аркасында безнең тарафтан бу хәлләрне булдырмау өчен берни дә эшләнми дигән тәэсир кала”, – диде кичә Татарстан Премьер-минист­рының беренче урын­басары Алексей Песошин журналистлар белән очрашуда.

Песошин 22 май көнне Гадәттән тыш хәлләр буенча комиссия утырышында кайбер район башлыкла­рының үз районнарының коену сезонына тулысынча әзер дип белдерүләрен дә шик астына куйды. Саннар, дөрестән дә, сагайтырлык. Әйтик, Яшел Үзән, Нурлат, Чистай, Түбән Кама районнары белән Чаллыда су керү сезоны башланганнан бирле – 5әр, Лаеш һәм Әлмәттә – 3әр, Сарман районында 2 кешенең гомере өзелгән. Хәтта соңгы елларда бу яктан тыныч яшәгән Әтнә районында да бер су корбаны теркәлгән. Пре­мьер-министр урынбасары сүзләренә караганда, бу фа­җигаләр, нигездә, махсус су коену урыннары булмау аркасында килеп чыккан. “Коену сезонының иң кызган мәлендә без респуб­ликаның 32 районында бер генә җиһазландырылган ком­лыкның да булмавын әйтергә мәҗбүр”, – диде ул.

Татарстанның Кече суднолар буенча баш дәүләт инспекторы Юрий Венедиктов исә суда мондый фаҗигале очраклар килеп чыгуның баш­ка сәбәпләрен дә атый. “Ел да үткәрелгән анализдан күренгәнчә, су корбаннары артуга күп очракта исерек килеш яки җиһаз­лан­ды­рыл­маган урын­нарда су керү, үз-үзеңә артык ышану, ата-ана­ларның баланы игътибардан читтә калдыруы, йөзә белмәү сәбәпче була”, – ди ул. Баш инспектор сүз­ләренә караганда, хәзерге вакытта Татарстан буенча Гадәттән тыш хәлләр министрлыгында 173 коену рөхсәт ителмәгән һәм нибары 37 җиһазландырыл­ган комлык исәптә тора. Юрий Венедиктов фикерен­чә, бу бик аз күрсәткеч. “Сулык­ларда ял итү куркынычсыз булсын өчен респуб­ли­каның һәр районында халык күпләп ял иткән урыннарны тикшереп йөриячәк махсус патруль төркем булдырырга кирәк”, – ди ул.

Татарстан Гидрометеорология һәм әйләнә-тирә мохит мониторингы ида­рәсе башлыгы Сергей Захаров хәбәр итүенчә, корылык аркасында якын арада рес­публиканың кайбер район­нарында гадәттән тыш хәл режимы кер­те­ләчәк. Шулай да халыкка бераз җиңел суларга ирек бирерлек бер­ничә салкынча көн булып алачак, дип ышандыра синоптиклар. Захаров сүзлә­ренә караганда, 29 июньнән башлап һава температурасы бераз түбә­нәячәк. Рес­публиканың кай­бер районнарында яңгыр яву да ихтимал. 1 июльдән исә республикада кабат эссе көннәр башланачак.