Камал театрының Уфа шәһәренә гастрольләре

Камал исемендәге Татар дәүләт Академия театрының традицион Уфа гастрольләре 2015 елның 10-17 сентябрендә М.Гафури исемендәге Башкорт дәүләт Академия драма театры һәм Уфа “Нур” татар дәүләт драма театры сәхнәләрендә узачак.

Татар театрының Уфа шәһәренә беренче гастрольләре, әле “Сәйяр” труппасы чорында, 1910 елда булган. Ә бүгенге көндә Камал театры традиция буенча ике елга бер мәртәбә Башкортостан тамашачысына спектакльләрен тәкъдим итә. Театр яңа 110 сезонында Башкортостанга моңа кадәр Уфада уйналмаган 12 спектаклен алып бара.
 
Гастроль афишасында 4 премьера. Флорид Бүләков пьесасы буенча куелган “Сөясеңме, сөймисеңме...” мелодрамасы; баш рольләрдә Равил Шәрәфиев һәм Дания Нуруллина. Узган сезонның иң зур премьерасы “Хуҗа Насретдин” (Нәкый Исәнбәт, Саадалла Ваннус). Уильям Шекспир трагедиясе буенча куелган “Ричард III” фаҗигале уены һәм тамашачыларыбызның иң яраткан комедияләреннән берсе Илгиз Зәйниевнең  “Мәхәббәт FM”.

Гастрольләр 10 сентябрьдә 19 сәгатьтә М.Гафури театры сәхнәсендә норвегия драматургы Йон Фоссеның “Җәйнең бер көнендә” спектакле белән ачыла. Әлеге спектакльнең фестиваль тарихы шактый бай. 2012 елда ул “Алтын Битлек” Милли театраль фестиваль-премиясенең дүрт номинациясендә катнашуга лаек булды. Афишада шулай ук Зөлфәт Хәкимнең “Искән җилләр көенә” романтик комедиясе, Т.Миңнуллинның “Диләфрүз-Remake” музыкаль комедиясе, татар сәхнәсендә беренче спектакль-фэнтези Илгиз Зәйниевнең “Кечтүкле уен” әкияте һәм 108 сезон премьерасы Галиәсгар Камалның “Банкрот” комедиясе.

Гастрольләр, әлбәттә, театрның “йөзек кашы” булган Кәрим Тинчуринның “Зәңгәр шәл”еннән башка уза алмый. Инде ничәнче мәртәбә куелуына карамастан, ул үзенең популярлыгын югалтмый. Халык мәхәббәте аша “Зәңгәр шәл” легендарь спектакльгә әверелде. Татар театрын “Зәңгәр шәл”сез күз алдына китерү дә мөмкин түгел.

Камал театрының Уфа шәһәрендә гастрольләре беренче мәртәбә ике театраль мәйданда: М.Гафури исемендәге Башкорт дәүләт Академия драма театры һәм Уфа “Нур” татар дәүләт театры сәхнәләрендә узачак.