10.06.2015 Мәдәният
Сезон ябылу уңаеннан Камал театры бүләк әзерләде
Билгеле булганча, 2015 елның 29 маенда Г.Камал исемендәге Татар дәүләт Академия театры үзенең 109 сезонын япты. Шуңа да карамастан, күп тамашачылар соравы буенча, театр җитәкчелеге июнь аенда ел дәвамында аншлаг белән барган өч спектакльне күрсәтергә булды: 11 июньдә - «Мәхәббәт FM», 12 июньдә - «Сөясеңме, сөймисеңме...” һәм 13 июньдә – «Хуҗа Насретдин».
11 июнь 19.00 - «Мәхәббәт FM», драматург һәм режиссер Илгиз Зәйниев.
Бу спектакль Камал Театры сәхнәсендә инде ике сезон барса да, аңа билетлар берничә ай алдан сатылып бетә. Моңарчы спектакльне күрү бәхетенә ирешә алмаган тамашачылар өчен бу менә дигән мөмкинлек!
12 июнь 18.00 - «Сөясеңме, сөймисеңме…» Флорид Бүләков.
Режиссер Радик Бариев тарафыннан сәхнәләштергән 109 сезон премьерасы. Баш рольләрдә Равил Шәрәфиев һәм Дания Нуруллина. Хәзер инде спектакль Флорид аганың якты истәлгенә багышланып уйнала. Автор үзе әйткәнчә: «Бу пьеса – мәхәббәт хакында. Хәер, башка күп кенә пьесалар кебек үк, тик алардан аермалы буларак, кыска вакытлы шаулы мәхәббәт хакында түгел, ә көчле, бер гомер озынлыгына тиң сөю турында. Әлбәтта, күп еллар эчендә әлеге мәхәббәт бәйрәмнәрне дә, гадәти көннәрне дә кичергән, тик тирәнлеген, көчен югалтмаган. Миңа калса, безнең һәркайсыбыз нәкъ шундый хисләр хакында хыяллана һәм шундый мәхәббәткә юлыккан кешеләр бәхетле».
13 июнь 18.00 – «Хуҗа Насретдин» Нәкый Исәнбәт һәм Саадалла Ваннус.
Үткән сезонның тамашачылар яратып өлгергән тагын бер премьерасы. Театр тәнкыйтьчесе, театрның әдәби бүлек мөдире Нияз Игъламов фикеренчә: «Режиссер Фәрит Бикчәнтәев “Җирән Чичәнгә” нечкә һәм төгәл чишелеш таба алды, театр тарафынна инде “онытылган” бу пьесаны сәнгатькә һәм мәхәббәткә тыйнак кына гимн сыман яңгыратты. Тышкы яктан биографик тоелган “Гөлҗамал” пьесасы нигезендә яткан театр сәнгатенең милләтне берләштерү миссиясе мәгънәләрен ачты. Шуңа күрә “Хуҗа Насретдин” да эчтәлеккә корылган җиңел генә комедия була алмас. Күпмедер мәгънәдә бу спектакль гаугалы да булырга мөмкин”.