Балалар бакчасында да Cабантуй

Кичтән яшенле яңгыр явып узса да, сабантуй иртәсе кояшлы булып туды, матур итеп бизәлгән мәйданда яңгыраган музыка астында кунакларны каршы алдылар. Чара башланганчы ук балалар үзара дуслашып та өлгерделәр, бергәләп йөгереп уйнап алдылар.

 

Бәйрәмне Кочко-Пожар бакчасы мөдире Алсу Әхмәтбаева ачып җибәрде, барлык катнашучыларга уңышлар теләде, кунакларга килгән өчен рәхмәт белдерде. Авыл администрациясе башлыгы Рөстәм Абдуллин да сабан туенда катнашучыларны сәламләп, иң җылы теләкләр теләде. Диляра Әхмәтбаева белән Эльнара Фәхретдинова татар биюе башкардылар.

 

Бәйрәм спорт ярышлары формасында оештырылган иде. Биш бала һәм биш әнидән торган өч команда да үзләренең исемнәре, девизлары белән таныштырды. Хуҗалар командасы “Радуга”, мәдәнәлеләрнеке “Солнышко”, суыксулыларныкы “Дружба” дип аталган иде. Ярышларны башларга гына җыендылар, каяндыр Шүрәле (аны Кочко-Пожар бакчасы тәрбиясесе Гөлсинә Хөсәинова бик оста уйнады) килеп чыкмасынмы! Ул бәйрәмгә ча-кырмаганга ачуланып, барысын да кытыкламакчы булды, әмма балалар аны да катнаштырырга вәгъдә биргәч, бу уеннан кире кайтты һәм гел арада булды. Ниһаять, ярышлар башланды, барысы да диярлек нәкъ чын сабантуйлардагыча – балалар һәм зурлар “атларда” чабыштылар, капчык киеп, күкәй салган кашыкны авызга кабып йөгерделәр, чүлмәк ваттылар, су ташыдылар. Милли уеннар белән беррәттән кыршаулар (обруч) аша чыгу, йомгак җыю, шар шартлату, бәхетле гаилә рәсемен ясау кебек ярышлар да булды. Олылар тәлинкәдәге катык эченнән кәнфитне дә таптылар. Ахырда Пеппи Длинный чулок (аны да Гөлсинә уйнады) белән бергәләп биеделәр, Наталья Бәдретдиновага кушылып әниләр “Цыганочка”да сибелделәр. Тулаем алганда, бәйрәм бик күңелле үтте, бала-чага гына түгел, олылар да

 

рәхәтләнеп күңел ачтылар. Ярышларга килгәндә, я бер, я икенче команда алынга чыга барды һәм, нәтиҗәдә, дуслык җиңде. Балларны жюри ролен үтәгән китапханәче Рамилә Мустафина саный барды һәм нәтиҗәләрне игълан итте. Һәр коллектив грамота белән бүләкләнде, ә балаларның һәрбересенә грамоталар һәм бүләкләр тапшырылды. Иң олы яшьтәге катнашучы, суык-сулы Бибинур Ситдикова да махсус грамота белән бүләкләнде. Суыксу бакчасы мөдире Гөлнара Рамазанова һәм Мәдәнә бакчасы мөдире Алсу Фәхретдинова оештыручыларга зур рәхмәт белдерделәр, ә Алсу Әхмәтбаева, үз чиратында, бу чараны традициягә кертеп, һәр ел уздырырга кирәк дигән тәкъдим белән чыкты. Иң мөһиме – балалар саны кимемәсен, бакчалар ябылмасын иде. Ә аларда, кагыйдә буларак, чын энтузиастлар эшли һәм безнең татар бакчаларының эше җитәкчелек тарафыннан һәрвакыт югары бәяләнә.

 

Кочко-Пожарда узган Кече сабантуй чәй өстәле артында җылы аралашу белән тәмамланды.

 

 

 

 

Наилә ТАҺИРОВА.