Азнакай укучылары катнашындагы инцидентта гаеплегә карата җәза чаралары кулланырга кирәк – Энгель Фәттахов

ТР Премьер-министры урынбасары – мәгариф һәм фән министры Энгель Фәттахов Татарстанның Азнакай һәм Тәтеш районнары мәгариф идарәләре башлыклары белән очрашты.

Искәртеп үтик: 28 май көнне Азнакайдан Казанга килгән 5-7 нче сыйныф укучылары, транспорт ватылу сәбәпле, үзләрен алып килгән автобуста төн кунарга мәҗбүр булган. Кичә ТР Хөкүмәте йортында республиканың юл хәрәкәте иминлеген тәэмин итү комиссиясе утырышында ТР буенча Эчке эшләр министрлыгының ЮХИДИ идарәсе башлыгы, комиссия җитәкчесе урынбасары Рифкать Миңнеханов сөйләгәнчә, сәфәр Азнакай районы Башкарма комитетының мәгариф идарәсе тарафыннан оештырылган, автобуста 44 бала һәм 5 озатып баручы булган. Транспорт чарасының техник төзеклеге тикшерелмәгән, йөртүче исә инструктаж узмаган. “Нәтиҗәдә, автобус Казанда ватылып калган, һәм балалар анда төн кунарга мәҗбүр булган”, - диде Р. Миңнеханов. Ул шулай ук автобусның файдаланышта 33 ел булуын да искәртте.

Балалар төркемнәрен утыртып йөртүгә бәйле кагыйдә бозу очрагының тагын берсе күптән түгел Тәтеш районында килеп чыккан.

Азнакай һәм Тәтеш районнары мәгариф идарәләре башлыклары белән очрашуда Энгель Фәттахов аларның килеп чыккан очраклар уңаеннан аңлатмасын тыңлады һәм бу төр инцидентларны башка булдырырга ярамавына игътибар юнәлтте.

Моннан тыш, ул Азнакай укучылары катнашындагы очрак өчен җаваплы затка карата катгый җәза чаралары кулланырга кирәклеген ассызыклады, дип хәбәр иттеләр ТР Мәгариф һәм фән министрлыгыннан.

Шуны да билгеләп узу зарур: кичә Хөкүмәт комиссиясе утырышында Энгель Фәттахов 25 май көнне “Җәйге сәламәтләндерү кампаниясен үткәрү чорында куркынычсызлык тәэмин итү буенча оештыру һәм профилактика чаралары комплексын тормышка ашыру турында”гы фәрманы раслануы һәм республиканың муниципаль районнарына җибәрелүе турында әйтте. Документта балаларны куркынычсыз утыртып йөртүгә аерым игътибар бирелә.

Моннан тыш, 27 май көнне муниципаль район башлыклары исеменә “Балалар төркемнәрен юлда йөртүгә бәйле киңәш-тәкъдимнәр” хаты юлланган. Әмма 28 һәм 29 май көннәрендә кагыйдәләр Азнакай һәм Тәтеш районнарында янә бозылган. Шуңа бәйле рәвештә, 2 июнь көнне Э.Фәттахов мәгариф идарәләре башлыклары белән мәктәп директорлары катнашында киңәшмә уздырды. Анда балаларны ташуга бәйле кагыйдә бозу очраклары каралды.

Татарстанда эшли башлаган “кайнар линия” буенча мәгариф оешмалары хезмәткәрләре балалар төркемнәрен юлда йөртүгә бәйле сораулар буенча консультация алырга мөмкин. “Кайнар линия” номеры – 8 (843) 294-95-17.

Әти-әниләр, күрелгән чаралар җитәрлек түгел дип санаса, бу хакта әлеге телефонга шалтыратып әйтә ала. “Кайнар линия” мәктәп автобуслары маршрутларына бәйле сораулар буенча да эшли.